16 śniežnia ŭ Mienskim haradskim sudzie abviaścili prysud hramadzianinu Izraila Ałanu Levitu. Jon apraŭdany pa spravie ab žorstkim zabojstvie biznesmiena, złačynstva adbyłosia ŭ 1993 hodzie. Vinavataj u zabojstvie raniej pryznali znajomuju Levita, u jakoj byŭ raman i ź im, i z zabitym. Žančyna daŭno adsiedzieła svoj 8-hadovy termin i zaraz prachodziła pa spravie jak śviedka. Ałan Levit vinu nie pryznaŭ, u sudzie zajaviŭ, što byłaja paluboŭnica ahavaryła jaho, kab vyharadzić sapraŭdnych złačyncaŭ. Pra spravu piša TUT.BY.
Fota: Volha Šukajła, TUT.BY
U Mienskim haradskim sudzie abviaścili prysud hramadzianinu Izraila Ałanu Levitu. Sud apraŭdaŭ jaho ŭ spravie zabojstva 25-hadovaj daŭniny. Abvinavačanaha vyzvalili ŭ zale suda.
Da abviaščeńnia prysudu mužčyna trymaŭsia ŭpeŭniena, chacieŭ pahutaryć z presaj.
— Sud pravioŭ daskanałaje raźbiralnictva. Zychodziačy z hetaha, mianie zaraz pavinny vyzvalić. U kožnym skazie čatyrochtomnaj kryminalnaj spravy pakazana, što ja nievinavaty, — paśla hetych słoŭ kanvoj zabaraniŭ abvinavačanamu razmaŭlać.
Prakuroru Leninskaha rajona vyniesiena pryvatnaje vyznačeńnie za parušeńnie zakanadaŭstva. Dziaržabvinavaŭca prasiŭ prysudzić mužčynu da 14 hadoŭ kałonii z 15 mahčymych pa zakonie za dadzienaje złačynstva. Sprava pa fakcie zabojstva biznesmiena nakiravana na novaje rasśledavańnie.
Ałan Levit paśla vyzvaleńnia zajaviŭ, što zaŭsiody vieryŭ, što jaho apraŭdajuć.
— Jakija vašy płany?
— Chutčej źjechać u Izrail, na mora, i bolš nikoli siudy nie viartacca.
Ałan Levit byŭ zatrymany ŭ žniŭni 2018-ha ŭ Niamieččynie, dzie jon adpačyvaŭ razam z synam. Na toj momant jon užo byŭ u bazie vyšuku Interpała. Jon byŭ ekstradziravany ŭ Biełaruś, i ŭvieś hety čas znachodziŭsia ŭ SIZA. Pavodle jaho słoŭ, tam jon mocna padarvaŭ zdaroŭje.
Nahadajem, u 1993 hodzie ŭ Sierabrancy byŭ zabity biznesmien, na jaho tvary i šyi było kala 16 nažavych ranieńniaŭ. Z kvatery napadniki vynieśli hrošy i deficytnuju pa tych časach techniku. Ałana Levita, pa viersii śledstva, z zabitym źviazvała ahulnaja znajomaja — Lilija Bystrova — u jaje byli stasunki i ź Levitam, i ź biznesmienam. Abvinavačany ŭ sudzie raspavioŭ, što Lila skardziłasia, byccam zabiaśpiečany zalotnik ździekujecca ź jaje «ŭ seksualnym płanie». Adnojčy jana pryniesła ŭ dom Levita darahuju techniku, skazała, što zabrała rečy z kramy biznesmiena i bolš da jaho nie vierniecca. Ałan, pavodle jaho słoŭ, rašeńnie Lilii padtrymaŭ i navat dapamahaŭ joj zbyć vykradzienaje. Pra toje, što biznesoŭca žorstka zabili, Levit, jak jon nastojvaje ŭ svaich pakazańniach, navat nie padazravaŭ. Ale nieŭzabavie vyrašyŭ źjechać ź Minska — na toj momant u jaho ŭžo było hramadzianstva Izraila.
— Ja nikoli nikoha nie zabivaŭ i nie rabavaŭ, — zajaviŭ abvinavačany ŭ sudzie. Levit nastojvaje, što jaho «padstaviła chitraja žančyna»: — Śledčy kazaŭ, što maja vina dakazanaja, treba tolki ŭsio pryznać. Ale ja ź pieršaha dopytu nie pryznaju vinu. Nijakich śladoŭ majoj prysutnaści na miescy złačynstva nie vyjaŭlena: ni adbitkaŭ palcaŭ, ni śladoŭ kryvi, choć Bystrova zajaviła, što padčas zabojstva ja paraniŭsia nažom. Nichto z susiedziaŭ mianie nie bačyŭ. Śviedka (majecca na ŭvazie Lilija, jakaja ŭžo adbyła pakarańnie, tamu zaraz prachodzić jak śviedka. — Zaŭvaha. TUT.BY) ahavorvaje mianie, kab samoj paźbiehnuć pakarańnia abo kab schavać kahości. Jana kazała, što nibyta moj baćka prychodziŭ da jaje maci, prasiŭ i navat pahražaŭ, kab jana ŭziała ŭsiu vinu na siabie. Heta niapraŭda: moj baćka na takoje nie zdolny i jaje maci takich pakazańniaŭ nie davała. Inšyja śviedki pa spravie — heta maje siabry, jany nie byli vidavočcami złačynstva. U 2010 hodzie prakuratura Izraila vyvučała materyjały spravy, byŭ adkaz, što dokazaŭ majoj viny nie pradstaŭlena. Ja zajaŭlaju ab svajoj nievinavataści.
Prysud u zakonnuju siłu nie ŭstupiŭ i moža być abskardžany abo apratestavany.
