Premjer-ministr Čechii Andrej Babiš acaniŭ nieabchodnaść vydaleńnia z krainy rasijskaha pasła. Jaho słovy pieradaje ria.ru.
Na dumku češskaha palityka, uzmacnieńnie napružanaści ŭ adnosinach pamiž dźviuma krainami nie patrabuje radykalnych mier, u tym liku i vypravadžeńnia rasijskaha pasła. Pry hetym jon padkreśliŭ, što Čechija nie dapuścić umiašańnia inšych dziaržaŭ u svaje palityčnyja spravy. «Niedapuščalna — kali heta praŭda — kab niejkaja inšaja dziaržava pravodziła tut akcyi suprać našych hramadzian», — skazaŭ na zakančeńnie Babiš.
22 krasavika češskaje vydańnie Respekt paviedamiła pra nibyta zafiksavanaje pierakidvańnie aficeraŭ śpiecsłužbaŭ z Rasii ŭ Jeŭropu. Śćviardžałasia, što ŭ aeraport imia Vacłava Haŭła prybyŭ supracoŭnik rasijskich śpiecsłužbaŭ, u bahažy jakoha mahła znachodzicca atruta — rycyn. Nibyta paśla hetaha niekalkich čynoŭnikaŭ, u tym liku kiraŭnika rajona Praha-6 Andržeja Kołarža, jaki inicyjavaŭ znos pomnika maršału Savieckaha Sajuza Ivanu Konievu, uziali pad uzmocnienuju achovu. Rasijski MZS abvierh usie abvinavačvańni.
Pomnik Konievu ŭ Prazie źnieśli 3 krasavika. U suviazi z hetym 10 krasavika Śledčy kamitet Rasii raspačaŭ kryminalnuju spravu pa artykule «Apahańvańnie znakaŭ voinskaj słavy Rasii, učynienaje publična». U MZS Čechii ŭ adkaz zajavili, što ličać pieraśled svaich čynoŭnikaŭ zamiežnaj dziaržavaj niedapuščalnym.
