Babrujčanin Andrej Karelin źbiraŭ podpisy za Viktara Babaryku, paśla sprabavaŭ trapić u vybarčuju kamisiju, ale jaho navat nie puścili na pasiedžańnie, dzie hetaje pytańnie vyrašałasia, piša «Radyjo Svaboda».
Andrej Karelin vyrašyŭ stać siabram vybarčaj kamisii na ŭčastku №73 u Pieršamajskim rajonie Babrujsku, paviedamlaje Tut.by.
Ale na pasiedžańnie, dzie musiać prymać rašeńnie ab uvachodžańni ŭ kamisiju Andreja i jašče čatyroch žycharoŭ Babrujsku, jakija chacieli trapić u vybarčyja kamisii, nie puścili. Nibyta ich dakumenty byli aformlenyja niapravilna.
U adkaz na heta Andrej zapisaŭ videazvarot da kiraŭnicy Centralnaj vybarčaj kamisii Lidzii Jarmošynaj.
«Lidzija Michajłaŭna, ja pavažaju vašuju pracu, dyk čamu ž manastyr čužy, a nas vy nazyvajecie supraćlehłym bokam. My što, hramadzianie inšaj krainy? Ci kampanija viadziecca nie za narodnyja hrošy? I čamu naohuł «manastyr», vybary — heta niešta zakrytaje?» — pytajecca Andrej Karelin.
Raniej u adkaz na nieŭklučeńnie ludziej u vybarčyja kamisii Lidzija Jarmošyna adkazała:
«U čužy manastyr sa svaim ustavam nia chodziać».
U skład učastkovych vybarčych kamisij, stvoranych na terytoryi Biełarusi, uklučyli tolki 5 čałaviek ź inicyjatyvy «Čiestnyje ludi». Jašče siamiora trapili ŭ kamisii, stvoranyja pry ambasadach pa-za miežami krainy.
Usiaho na platformie «Čiestnyje ludi» adznačylisia 2192 čałavieki, jakija napisali, što padali zajavy na ŭklučeńnie va ŭčastkovyja kamisii.