MZS Rasii / TASS
Azierbajdžan i Armienija pa vynikach pieramoŭ u Maskvie damovilisia ab spynieńni ahniu ŭ Nahornym Karabachu z 12:00 10 kastryčnika. Pra heta zajaviŭ ministr zamiežnych spraŭ Rasii Siarhiej Łaŭroŭ na bryfinhu pa vynikach sustrečy kiraŭnikoŭ MZS abiedźviuch krain, piša RBK.
«Abviaščajecca ab spynieńni ahniu z 12:00 10 kastryčnika 2020 hoda ŭ humanitarnych metach dla abmienu vajennapałonnymi i inšymi asobami i ciełami zahinułych», — paviedamiŭ Łaŭroŭ.
Pavodle jaho słoŭ, kankretnyja paramietry režymu spynieńnia ahniu buduć uzhodnieny dadatkova. Akramia taho, Azierbajdžan i Armienija pry padtrymcy Minskaj hrupy ABSIE prystupajuć da pieramoŭ dla mirnaha ŭrehulavańnia karabachskaha kanfliktu.
Trochbakovyja pieramovy kiraŭnikoŭ MZS Armienii, Azierbajdžana i Rasii pačalisia dniom u piatnicu, 9 kastryčnika, i padoŭžylisia bolš za dziesiać hadzin. Napiaredadni Uładzimir Pucin zaklikaŭ Baku i Jerevan spynić bai, kab abmianiacca ciełami zahinułych i pałonnymi. Pierad zvarotam Pucin pravioŭ šerah pieramovaŭ z prezidentam Azierbajdžana Ilchamam Alijevym i premjeram Armienii Nikołam Pašynianam.
Na fonie pieramovaŭ pradstaŭnik Minabarony Armienii Arcrun Avanisian paviedamiŭ, što vojska Azierbajdžana naniesła čarhovy ŭdar pa stalicy niepryznanaj Nahorna-Karabachskaj Respublicy Ściepanakiercie. Pierad hetym u Baku paviedamili ab źbitaj balistyčnaj rakiecie, zapuščanaj z terytoryi Armienii.
