Fota z fejsbuka
Premjer-ministr Armienii Nikoł Pašynian paviedamiŭ, što znachodzicca na radzimie i praciahvaje vykonvać svaje abaviazki. Takuju zajavu jon zrabiŭ na fonie biesparadkaŭ paśla padpisańnia Pahadnieńnia ab pieramirji ŭ Karabachu, piša RBK.
«Ja, viadoma, znachodžusia ŭ Armienii i paŭnavartasna vykonvaju pracu premjer-ministra», — napisaŭ jon u fejsbuku.
Nočču, kala 2:30 pa miascovym časie, hrupa pratestoŭcaŭ u Jerevanie ŭvarvałasia ŭ budynak urada i razhramiła zału pasiadžeńniaŭ. Jak raspaviali achoŭniki budynka, premjera ŭnutry nie było. Paźniej hrupa pratestoŭcaŭ adpraviłasia da rezidencyi Pašyniana.
Akramia taho, u chodzie pratestaŭ byŭ źbity śpikier armianskaha parłamienta Ararat Mirzajan. Demanstranty vyciahnuli jaho z mašyny, paśla čaho ŭ kanflikt pryjšłosia ŭmiašacca achovie i vajskoŭcam.
U noč na 10 listapada kiraŭniki Armienii, Azierbajdžana i Rasii abviaścili ab zakančeńni vajny ŭ Nahornym Karabachu i padpisańni pahadnieńnia ab miry. Zhodna z damoŭlenaściami, usie vajennyja dziejańni ŭ zonie kanfliktu spyniajecca z 0:00 10 listapada, a baki spyniajucca na zajmanych imi pazicyjach. Pahadnieńnie taksama praduhledžvaje ŭvod rasijskich miratvorcaŭ. Častka terytoryj piarojdzie Azierbajdžanu.
Prezident Azierbajdžana Ilcham Alijeŭ nazvaŭ padpisańnie dakumienta pahadnieńnia «kapitulacyjaj Armienii». Pa jaho słovach, Baku damohsia miru na vyhadnych dla siabie ŭmovach i dasiahnuŭ «usich metaŭ». Alijeŭ taksama zajaviŭ, što ŭ zonie kanfliktu raźmieściacca tureckija miratvorcy, choć u dakumiencie ab udziele Turcyi va ŭrehulavańni nie zhadvajecca.
