Ad pačatku listapada «Kamsamolskuju praŭdu ŭ Biełarusi» ŭznačaliŭ adyjozny rasijski žurnalist Alaksandr Koc. Heta adbyłosia paśla mocnaha cisku na redakcyju: pasadki žurnalistaŭ, admovy ŭ druku haziety.
Koc padpisany ŭ vychodnych źviestkach nie jak vykanaŭca abaviazkaŭ redaktara, a jak paŭnavartasny hałoŭny redaktar.
Čytajcie: «Kamsamolskuju praŭdu ŭ Biełarusi» ŭznačaliŭ adyjozny rasijski žurnalist Koc, uznaharodžany za Krym
Ale pavodle zakanadaŭstva hetu pasadu moža zajmać tolki ŭładalnik biełaruskaha pašparta. Jak Kocu ŭdałosia abyści praviła?
Niekalki dziasiatkaŭ čałaviek skłali kalektyŭny zvarot u Ministerstva infarmacyi z prośbaj pravieści pravierku.
«U vyznačany zakanadaŭstvam termin ministerstva pravieryć adpaviednaść hałoŭnaha redaktara patrabavańniam biełaruskaha zakanadaŭstva i abaviazalnictvam krainy pa mižnarodnych damovach», — havorycca ŭ adkazie namieśnika ministra infarmacyi Ihara Buzoŭskaha.
«Naša Niva» paprasiła Buzoŭskaha patłumačyć, jak mienavita buduć praviarać Koca i ci paprosiać prademanstravać pašpart. Čynoŭnik nie staŭ udakładniać i tolki zapeŭniŭ, što ŭsie farmalnaści buduć vytrymanyja.
