Na pradpryjemstvie BiełVTI raspaviali «Minsk-Navinam», što za minuły hod sabrali ŭ minčan 864 tony bytavych pryboraŭ, jakija stali nie patrebnyja haspadaram. I heta bolš, čym va ŭsie papiarednija hady.
Niahledziačy na najaŭnaść pryjomnych punktaŭ, haradžanie addavali pieravahu pasłuzie BiełVTI-taksi. Z ahulnaj masy 681 tonu dastavili mienavita hetyja aranžavyja mašyny. Štodnia pa stalicy ich kursiruje dźvie-try, z 9:00 da 20:00 jany abjazdžajuć 20-30 adrasoŭ. Taksi pryjazdžaje va ŭzhodnieny z zakazčykam čas i biaspłatna vyvozić elektrachłam.
U minułym hodzie žychary stalicy čaściej za ŭsio zdavali na pierapracoŭku televizary. Ich u BiełVTI pastupiła 3564. Hazavych i elektryčnych kuchonnych plit sabrali 2713, chaładzilnikaŭ — 2411, pralnych mašyn — 1607.
Byvajuć i ŭnikalnyja vypadki. Minułym letam z dačnaha pasiołka pad Minskam vyvieźli 690 kh techniki. Haspadar za raz zdaŭ chaładzilnik, marazilnik, dźvie hazavyja plity i adnu elektryčnuju, pralnuju mašynu, dva televizary, radyjołu i šmat čaho jašče. Takim čynam mužčyna nie tolki pazbaviŭsia ad zaležaŭ, ale i zarabiŭ kala 100 rubloŭ.
Časam ludzi addajuć na pierapracoŭku ŭnikalnyja prybory, sapraŭdnyja artefakty. U BiełVTI ŭspaminajuć, jak u 2019-m padčas akcyi pa pošuku samaha staroha televizara ŭ Biełarusi vyjaviŭsia KVZ-49 1952 hoda vypusku. Jaho, darečy, nie razabrali, a razam ź inšymi antykvarnymi pradmietami bytavoj techniki bieražliva zachoŭvajuć i spadziajucca stvaryć svojeasablivy muziej. Pakul ža rarytety hatovyja zdavać naprakat usim žadajučym.
Prymajuć u BiełVTI nie tolki bujnyja bytavyja prybory. Zdać možna i ŭsiakuju drobiaź: telefony, smartfony, myški, kłavijatury, pulty i hetak dalej. Usio heta možna addać hruzčykam, jakija vyvoziać bujnuju techniku. A možna pakłaści ŭ śpiecyjalnyja kantejniery dla zboru drobnaj techniki, jakija raźmieščany ŭ niekatorych handlovych abjektach Minska.
— Płanujecca ŭstaloŭvać padobnyja jomistaści i na prydamavych terytoryjach, — kažuć śpiecyjalisty. — U hetyja kantejniery ŭvojduć takija pradmiety, jak nievialikija pryntar abo faks, sokavyciskałka, elektračajnik, miksier. Tudy ž možna budzie adpraŭlać i staryja navahodnija lampavyja hirlandy.
Niepatrebnuju elektroniku možna pryvieźci ŭ punkty pryjomu samastojna. Taki sposab vybirajuć ludzi, jakija žadajuć zarabić. Za chaładzilnik možna atrymać 25 kapiejek za kiłahram, za plitu — 35 kapiejek za kiło. Takaja ž masa noŭtbukaŭ kaštuje 2 rubla 15 kapiejek, a smartfonaŭ (biez batarej) — 5 rubloŭ 20 kapiejek.
Ale čaściej haradžanie nabirajuć karotki numar 7383 (zvanok biaspłatny dla abanientaŭ MTS i life:), a dla abanientaŭ A1 — pa taryfach apieratara) i vyklikajuć biaspłatnaje BiełVTI-taksi.
