Mikałaj Bandarenka. Fota IA «Viersija-Saratov».
Deputat abłasnoj dumy z rasijskaha Saratava Mikałaj Bandarenka atrymaŭ viadomaść, dziakujučy svajmu błohu ŭ YouTube, u jakoha bolš za 1,23 młn padpisčykaŭ. Ciapier deputata-kamunista zatrymali z-za taho, što jon prysutničaŭ na mitynhu ŭ padtrymku Alaksieja Navalnaha.
Usiaho pa Rasii za ŭdzieł u mitynhach 23 i 31 studzienia zatrymali kala 10 tysiač čałaviek, heta była pakazalnaja akcyja raspravy. Ludziej zatrymlivali za sam fakt vychadu na pratest. Tym nie mienš, pratesty, što adbylisia, pa svajoj hieahrafii byli najšyrejšyja ŭ Rasii z 1990-ch.
Psieŭdaapazicyjnyja partyi Kamunistyčnaja, Libieralna-demakratyčnaja i «Spraviadlivaja Rasija» ŭpisanyja ŭ rasijskuju palityčnuju sistemu u jakaści biaśpiečnych sparynh-partnioraŭ partyi ŭłady i asabista Uładzimira Pucina, nie kidajučy vykliku joj u realnaści. Uzamien jany atrymlivajuć mahčymaść atrymlivać mienšaść mandataŭ na vybarach roznaha ŭzroŭniu i za košt hetaha isnujuć. Niaźmiennyja z 1990-ch lidary psieŭdaapazicyi Uładzimir Žyrynoŭski i Hienadź Ziuhanaŭ kamfortna adčuvajuć siabie ŭ hetaj roli.
Deputat Bandarenka staŭ viadomy svajoj rezkaj krytykaj miascovych uładaŭ, u tym liku sarataŭskaj čynoŭnicy, jakaja paraiła ludziam jeści «makaroški», kali nie chapaje hrošaj na inšaje.
Antykarupcyjny błohier Alaksiej Navalny, u adroźnieńnie ad maskoŭskich libierałaŭ staroha pakaleńnia, ličyć, što partyi psieŭdaapazicyi treba vykarystoŭvać u baraćbie suprać Uładzimira Pucina, abjadnaŭšy pratesny elektarat.
U 2020 hodzie Navalnaha sprabavali atrucić chimičnym rečyvam «Navičok». Mižnarodnaje žurnalisckaje rasśledavańnie pakazała, što za atručvańniem stajali supracoŭniki rasijskich śpiecsłužbaŭ. Navalny tolki cudam, dziakujučy apieratyŭnym dziejańniam sibirskich miedykaŭ, jakija intuityŭna ŭviali jamu antydot atrapin, zastaŭsia žyvy. Ledźvie apraviŭšysia ad atručvańnia, Alaksiej Navalny viarnuŭsia ŭ Rasiju i apublikavaŭ novaje šakujučaje rasśledavańnie pra bahaćcie Uładzimira Pucina i jaho siabroŭ.
