Fota Dzijany Kasiakinaj, Intex-press.by
U Baranavičach sud razhledzieŭ kryminalnuju spravu nastaŭnika fizkultury haradskoj škoły №12: jaho abvinavačvajuć u pryčynieńni ciažkaha cialesnaha paškodžańnia 14-hadovamu vučniu. 4 sakavika jaho pryznali vinavatym u naŭmysnym pryčynieńni ciažkaha cialesnaha paškodžańnia — złačynstvie, praduhledžanym č. 1 art. 147 KK RB — i vynieśli prysud: 2 hady i 6 miesiacaŭ abmiežavańnia voli biez nakiravańnia ŭ vypraŭlenčuju ŭstanovu adkrytaha typu («chatniaja chimija»). Pra heta paviedamlaje miascovy resurs Intex-press.
Prysud suda całkam supadaje z tym, što prasiła ŭ sprečkach dziaržabvinavaŭca.
Da suda abvinavačany prynios svaje prabačeńni i padletku, i jaho siamji, kampiensavaŭ maralnuju škodu. Materyjalnych pretenzij jany da jaho nie mieli.
Mužčyna ŭ apošnim słovie paprasiŭ prabačeńnia ŭ chłopčyka i jaho mamy:
— Prapracavaŭ u sistemie adukacyi bolš za 20 hadoŭ. Zaŭsiody byli dobryja adnosiny i z vučniami, i z kalehami. ( … ) Ja škaduju i raskajvajusia, što pryčyniŭ bol, nanios traŭmu vučniu. Kožny dzień škaduju ab hetym i dumaju pra jaho zdaroŭje.
Ekśpiertyza pakazała, što padletak atrymaŭ ciažkaje cialesnaje paškodžańnie.
Incydent adbyŭsia 30 listapada. U raspranalni spartzały nastaŭnik fizkultury zaŭvažyŭ u rukach adnaho z vučniaŭ elektronnuju cyharetu. Mužčyna adčytaŭ padletka, a zatym paciahnuŭ za ruku, kab toj vyjšaŭ z pamiaškańnia. Na vychadzie jon udaryŭ školnika nahoj u pachvinu.
Padletku stała błaha. Baćki advieźli jaho ŭ balnicu. Miedyki dyjahnastavali razryŭ pravaha jaječka. Paśla apieracyi školnika vypisali i adpravili dadomu na ambułatornaje lačeńnie.
Ekśpiertyza pakazała, što padletak atrymaŭ ciažkaje cialesnaje paškodžańnie.