Pahladzieŭšy naviny aficyjnych ŚMI subotnim viečaram, možna było padumać, što da ŭłady pryjšoŭ Zianon Paźniak.
Niekatoryja repartažy ledź nie cytavali ŭryŭki Zianona 15‑hadovaj daŭniny pra rasijski impieryjalizm. Łukašenka pravioŭ ekstranuju naradu i admianiŭ svaju pajezdku ŭ Maskvu… Akramia taho, Ryhoravič zapatrabavaŭ uvieści na biełaruska‑rasijskaj miažy pahraničnyja i mytnyja zasłony.
Telebačańnie dźviuch krain h.zv. sajuznaj dziaržavy adrazu ž dałučyłasia da vajennych dziejańniaŭ. Rasijskija ŚMI ŭžo daŭno navučylisia ŭ našych asnoŭnym mietadam prapahandy i piaru patrebnych idejaŭ.
Rasijskija kanały, što padajecca, pieršyja i raspačali małočnuju vajnu, praciahvajuć hanić našaje małako, kiraŭnictva małočnych pradpryjemstvaŭ, zhadvajuć pra častyja sastupki biełarusam, paŭhadovaje čakańnie pieramienaŭ u małočnaj halinie, paŭdniovaamierykanskija damieški ŭ małočnych praduktach i žachlivyja antybijotyki.
Z ekranaŭ biełaruskich televizaraŭ zhadali nam pra padobny niekali cisk rasijskaha kiraŭnictva na małdaŭskija i hruzinskija viny, hruzinskuju minierałku, łatvijskija šproty, polskuju śvininu.
Pakazali repartaž z Branskaj vobłaści, dzie prostyja rasijskija hramadzianie chvalili našyja pradukty, ich jakaść i košt, a paśla škadavali, što ciapieraka nie mohuć taho nabyć. My pabačyli pustyja palicy ŭ rasijskich kramach, jakija nazvali ščarbinami Aniščanki.
Čamuści tolki nie čuvać zaklikaŭ padtrymać našych małočnikaŭ. Hetkaja biełaruskaja salidarnaść — nabyvać krychu bolš małočnych praduktaŭ.
