Hienprakuratura vyjaviła fakty niepravamiernaha vydzialeńnia placaŭ pad budoŭlu čynoŭnikam MZS, Minekanomiki, MUS.
Šmatlikija fakty niepravamiernaha vydzialeńnia ziamielnych učastkaŭ čynoŭnikam roznych ranhaŭ, rabotnikam bankaŭ i pradstaŭnikam parłamienta pryvioŭ hienieralny prakuror Biełarusi Ryhor Vasilevič 19 červienia na 5‑j respublikanskaj kaardynacyjnaj naradzie pa baraćbie sa złačynnaściu i karupcyjaj.
Pavodle jaho słoŭ, prakurorskimi pravierkami byli achopleny rašeńni, pryniatyja na miascovym uzroŭni, u śfiery rehulavańnia ziamielnych adnosin u 2006—2009 hadach. «U Biełarusi dapuskajecca masavaje hrubaje parušeńnie ziamielnaha zakanadaŭstva ŭ śfiery vydzialeńnia i kanfiskacyi ziamielnych učastkaŭ, pryčym va ŭsich rehijonach», — zajaviŭ hienprakuror.
Siarod asnoŭnych parušeńniaŭ Vasilevič vyłučyŭ nastupnyja:
nievydzialeńnie ziamielnych učastkaŭ hramadzianam, jakija majuć u ich patrebu, i adnačasova ich vydzialeńnie tym, chto nie maje takoj patreby; niepraviadzieńnie aŭkcyjonaŭ dla vydzialeńnia ziamli hramadzianam, jakija nie majuć patreby ŭ palapšeńni žyllovych umoŭ; samavolny zachop ziamli jak hramadzianami, tak i pradprymalnikami; niametavaje vykarystańnie ziamli, vydzielenaj dla absłuhoŭvańnia žyłych damoŭ; pieraprodaž atrymanych učastkaŭ z parušeńniem zakanadaŭstva; zavyšeńnie cen na ŭčastki, vystaŭlenyja na aŭkcyjony; adsutnaść kantrolu z boku miascovych uład i ziemleŭparadkavalnych słužbaŭ za vykanańniem žyllovaha zakanadaŭstva; indyvidualnaje pryniaćcie rašeńniaŭ słužbovymi asobami miascovych orhanaŭ ab vydzialeńni ziamielnych učastkaŭ.
Pavodle słoŭ hienprakurora, u liku hramadzian, u dačynieńni da jakich byli pryniaty i mahli być pryniaty niepravamiernyja rašeńni ab vydzialeńni ziamielnych učastkaŭ,
— deputat Pałaty pradstaŭnikoŭ, šerah supracoŭnikaŭ MZS, namieśnik ministra ekanomiki, były načalnik kryminalnaha vyšuku MUS, pradstaŭnik departamienta vykanańnia pakarańniaŭ MUS, rabotnik kancerna «Biełnaftachim»,
žonka byłoha kiraŭnika spraŭ Smalavickaha rajvykankama, rabotnik «Biełahraprambanka», vykładčyk Akademii MUS, staršynia Białynickaha rajvykankama, namieśnik staršyni Homielskaha abłvykankama, supracoŭnik DAI Frunzienskaha RUUS stalicy, adzin z kiraŭnikoŭ Dziaržaŭnaha vajenna‑pramysłovaha kamiteta, były staršynia Mazyrskaha rajvykankama, rabotnik sakrataryjata Savieta Respubliki.
Vasilevič asobna źviarnuŭ uvahu na šmatlikija parušeńni ŭ śfiery vykarystańnia lasnoha fondu. Havorka, pavodle jaho słoŭ, idzie pra samavolny zachop učastkaŭ, budaŭnictva palaŭničych leciščaŭ, zaimak. U jakaści prykładu jon nazvaŭ Brasłaŭski rajon, dzie hramadzianin na voziery Snudy samavolna źmianiŭ bierahavuju liniju, stvaryŭšy dva kanały.
Najbolšyja pretenzii ŭ śfiery vykanańnia ziamielnaha zakanadaŭstva hienprakuror vykazaŭ na adras miascovych orhanaŭ ułady i ziemleŭparadkavalnych słužbaŭ.
Vasilevič prapanavaŭ Savietu biaśpieki razhledzieć mahčymaść pieravodu ŭ padparadkavańnie Hienieralnaj prakuratury ziemleŭparadkavalnych słužbaŭ abo navat Dziaržaŭnaha kamiteta pa majomaści ŭ cełym. Tady, ličyć, Vasilevič, možna budzie navieści paradak.
