Alaksandar Łapšyn (u čornaj futbołcy) pobač z Alaksandram Kaniukom (u sinim stroi) i pasłami Italii i Indyi ŭ Armienii.
Fatahrafija z turystyčnaj vystavy ŭ stalicy Armenii vyklikała šmat pytańniaŭ da błohiera, i jon patłumačyŭ abstaviny sustrečy.
U čas turystyčnaj vystavy ŭ Domie mastaka ŭ stalicy Armenii Jerevanie niečakana sustrelisia viadomy błohier Alaksandar Łapšyn, jakoha ŭtrymlivali ŭ SIZA-1 na Vaładarskaha, i ciapierašni pasoł Biełarusi ŭ Armenii Alaksandar Kaniuk. Siabry i znajomyja Łapšyna nie zrazumieli, jak jon moh vyjści na adnu scenu z Kaniukom — toj da 2020 hodu byŭ hieneralnym prakuroram i padpisvaŭ dakument na vydaču Łapšyna ŭ Azerbajdžan.
Alaksandra Łapšyna, jaki maje hramadzianstva Rasiei i Izrailu, zatrymali ŭ śniežni 2016 hodu ŭ Miensku na zapyt Azerbajdžanu. Jaho abviaścili ŭ mižnarodny vyšuk za naviedvańnie Nahornaha Karabachu biez dazvołu ŭładaŭ Azerbajdžanu. Paźniej prezident krainy Alijeŭ pamiłavaŭ jaho.
Na vystavie Łapšyn i Kaniuk byli pačesnymi haściami i navat adnačasova vyjšli na scenu, dzie ich sfatahrafavali pobač z pasłami Indyi i Italii. Ad kalektyŭnaha fota z Kaniukom paśla vystupleńniaŭ za mikrafonam Łapšyn admoviŭsia, jak i ad pociskaŭ ruk.
Łapšyn patłumačyŭ, što vydatna pamiataje, što mienavita Kaniuk stajaŭ za jaho vydačaj Azerbajdžanu. Ale razam z tym nazvaŭ ciapierašniaha biełaruskaha pasła ŭ Jerevanie adnym ź ludziej, «jaki nia maje ni svajho mierkavańnia, ni svajoj pazycyi. Heta słuhi Łukašenki, jakich kidajuć z adnoj pasady na inšuju».
Alaksandar Łapšyn u razmovie sa Svabodaj pryznaŭsia, što, na jaho dumku, Kaniuk, «adkazny za pasadki ŭ turmy tysiač biełarusaŭ, pavinien być vyhnany z Armenii».
«Adpravili jaho siudy, kab cicha adsiedziecca, pakul žarści nia zhasnuć», — dadaŭ błohier.
Alaksandar Łapšyn nie adnojčy ładziŭ akcyi ŭ padtrymku źniavolenych u Biełarusi kala ambasadaŭ Biełarusi ŭ Vilni i Londanie i kala budynku Rady Eŭropy ŭ Strasbury.
