13 lipienia ŭ rasparadžeńni kampanii BiełaPAN akazalisia fota‑ i videaśviedčańni moru ryby ŭ race Nioman kala vioski Novy Śvieržań (Staŭbcoŭski rajon Minskaj vobłaści).
Z 6 lipienia tut na pavierchni vady prykmietnyja maślanistyja plamy i niežyvaja ryba.
Jak pryznaje načalnik Staŭbcoŭskaj rajonnaj inśpiekcyi pryrodnych resursaŭ i achovy navakolnaha asiarodździa Hienadź Kałasoŭski, u Niomanie kala vioski Novy Śvieržań sapraŭdy adbyŭsia mor, adnak zahinuła nievialikaja kolkaść ryby;
asnoŭnaja pryčyna — małoje ŭtrymańnie kisłarodu ŭ vadzie. Pavodle mierkavańnia Kałasoŭskaha, heta stała vynikam mocnych daždžoŭ, što vyklikali raźliŭ raki, jakaja zatapiła pakosy i pašy.
Naziemnyja raśliny, što trapili ŭ vadu, hnijuć i tym samym vyklikajuć padzieńnie ŭzroŭniu kisłarodu. Što da maślanistych plamaŭ na pavierchni vady, to H.Kałasoŭski dapuskaje, što pry raźlivie vady ŭ raku mahli trapić «koła abo hajka», pakinutyja na bierazie raki miascovymi žycharami.
Śpiecyjalisty rajinśpiekcyi vyjazdžali na miesca, kab razabracca ź situacyjaj. Akramia taho, 6 lipienia była ŭziataja proba vady Minskaj abłasnoj łabaratoryjaj analityčnaha kantrolu, a 10 lipienia — śpiecyjalistami Respublikanskaha hidramietearałahičnaha centra.
Adnak, zapeŭnivaje Kałasoŭski, ničoha inšaha, akramia panižeńnia ŭzroŭniu kisłarodu, u vadzie vyjaŭlena nie było, i situacyja narmalizujecca, kali raka ŭvojdzie ŭ rečyšča.
Zahadčyca Minskaj abłasnoj łabaratoryi analityčnaha kantrolu Ministerstva pryrodnych resursaŭ i achovy navakolnaha asiarodździa Halina Tatur paćviardžaje, što, pavodle vynikaŭ analizu prob vady na tym učastku Niomana, pryčynaj moru ryby pryznana małoje ŭtrymańnie kisłarodu. Vidavočna, heta adbyłosia z‑za daždžoŭ, ličyć jana. «Nijakich skidvańniaŭ u vody Niomana nie zafiksavana», — skazała śpiecyjalist.
Adnak pryčynaj zafiksavanych na fota i videa maślanistych plam u pratočnaj vadzie nie moža być «koła abo hajka».
Pavodle mierkavańnia dacenta kafiedry vodazabieśpiačeńnia i vodaadvodu Biełaruskaha nacyjanalnaha techničnaha univiersiteta Uładzimira Anufryjeva,
Takija plamy mohuć być vyklikanyja naftapraduktami abo chimikatami, jakija pa składzie blizkija da naftapraduktaŭ.U Nioman jany mahli trapić u vyniku skidvańnia, a taksama pry raźlivie raki, kali «vada mahła zalić u tym liku i składy roznych rečyvaŭ». Pry papadańni ŭ raku arhaničnyja rečyvy raskładajucca, i idzie intensiŭnaje pahłynańnie kisłarodu, jakoje i vyklikała mor ryby.
Pry hetym U.Anufryjeŭ padkreśliŭ, što dla kančatkovych vysnoŭ nieabchodna praviadzieńnie chimičnaha analizu vady.
