Śpiavak adznačyŭ dzień narodzinaŭ tradycyjnym kancertam u kole siabroŭ.
Śviatočny kancert Źmitra Vajciuškieviča adbyŭsia 20 lipienia ŭ kancertnaj zali «Minsk». Čamu śviatočny? Tamu, što hetym kancertam muzyka praciahnuŭ dobruju tradycyju, zhodna ź jakoj jaki ŭžo hod 20 lipienia, u svoj dzień naradžeńnia, jon daje kancert u Minsku.
Pieršymi pavinšavali Źmitra ŭdzielniki hurtu «Huda». Jany zaśpiavali niekalki pieśniaŭ i padaravali pas ručnoj raboty. Zhodna ź biełaruskimi vieravańniami pas simvalizavaŭ žyćcio i vykonvaŭ rolu abiaroha. Da taho ž, ličyłasia, što kali adzin čałaviek paviaža druhomu pas, to jany buduć źviazanyja suviaźziu na ŭsio žyćcio, raspaviała adna z udzielnic «Hudy».
Nakont kancertnaj prahramy Źmicier Vajciuškievič adrazu papiaredziŭ, što asabliva nie rychtavaŭsia i paabiacaŭ šmat muzyčnych niečakanak.
Pieršaj takoj niečakankaj stała pieśnia «Śpi-zaśni, vułkan-aniołak» na vieršy Arcioma Kavaleŭskaha. U chutkim časie pavinien źjavicca albom, jaki budzie uklučać 21 pieśniu na vieršy hetaha aŭtara.Pa słovach Źmitra Vajciuškieviča, heta pazityŭnyja pieśni dla dziaciej i nie tolki.
Jašče adnym pryjemnym siurpryzam stała pieśnia «Elsie» na vierš Krystafiera Leandoera, napisanaja Źmitrom padčas V-ha źjezdu biełarusaŭ śvietu.
Praśpiavaŭšy jašče niekalki pieśniaŭ, Vajciuškievič zaprasiŭ na scenu hurt «Zimovaja vajna z Tybietam». Paśla vystupleńnia hurtu muzyka zaŭvažyŭ, što ŭ praciah budyjskaj temy ničoha inšaha nie prychodzić u hałavu, akramia błatniaku, i zaciahnuŭ «Irku Jermalinskuju».
Bolšaść pieśniaŭ, vykananych padčas kancertu, napisanyja na vieršy Ŭładzimira Niaklajeva, jaki, darečy, prysutničaŭ na kancercie, tak što Źmicier navat pažartavaŭ, što heta nie jahony bieniefis, a bieniefis Niaklajeva. Apošni ŭ kancy kancertu pavinšavaŭ sa sceny imianińnika i praśpiavaŭ svaju viersiju «Irki Jermalinskaj», čym sarvaŭ burnyja apładysmienty hledačoŭ.
Akramia vyšejnazvanych pavinšavać Źmitra pryjšli piśmieńnik Uładzimir Arłoŭ, bard Aleś Kamocki, biźniesmien Źmicier Papoŭ, hurt «Bosaje sonca», Ksienija Minčanka i kampanija.
Uładzimir Arłoŭ zajaviŭ, što chacieŭ by, kab Źmicier Vajciuškievič kali-niebudź napisaŭ pieśniu na jahonyja vieršy. Mienavita z hetaj pryčyny jon i staŭ pisać u ryfmu. «Źmicier havoryć, što ŭ maich vieršach šmat niecharošych słovaŭ, na takija vieršy pieśni nie pišucca, tamu ja ciapier starajusia pisać vieršy, dzie było b mieniej niecharošych słovaŭ», — pažartavaŭ Arłoŭ.
Udzielniki «Bosaha sonca», pavinšavaŭšy Źmitra, zaŭvažyli, što pra jahony tvorčy šlach možna pisać padručnik dla muzykaŭ-pačatkoŭcaŭ, na što Vajciuškievič adkazaŭ žartam: «Abviaščajecca konkurs: ja hatovy pradać pravy na napisańnie knihi pra maju tvorčaść».
Chacia dzień naradžeńnia byŭ u Źmitra Vajciuškieviča, padarunki atrymaŭ nie tolki jon sam, ale i ŭsie ŭdzielniki kancertu.
Muzyka padaryŭ kožnamu vystupoŭcu dysk karaokie «Śpiavaj, vasilkovy kraj!» Na dysku zapisanaja muzyka 36 pieśniaŭ Vajciuškieviča.
Pry kancy kancertu Źmicier Vajciuškievič pasprabavaŭ siabie ŭ jakaści nastaŭnika. Usia zała razvučvała pad jahonym kiraŭnictvam słovy pieśni «Byvajcie zdarovy, žyvicie bahata». Padajecca, urok prajšoŭ dastatkova paśpiachova.
