Ministerstva achovy zdaroŭja Biełarusi paviedamiła: balnicy ŭ krainie pastupova viartajucca ŭ zvykły režym pracy, pandemija COVID-19 adstupaje. Da raniejšaj pracy viartajucca miedustanovy ŭ Minsku, Bresckaj, Viciebskaj, Homielskaj, Hrodzienskaj, Minskaj i Mahiloŭskaj abłaściach. Pravodzicca dezapracoŭka, adnaŭlajecca płanavaja miedycynskaja dapamoha.
Ale ŭ toj ža čas miedyki papiaredžvajuć: na paru z karanavirusam u Biełarusi ciapier hulaje jašče i siezonny hryp. Pra jaho simptomy i adroźnieńni ad COVID-19 «Našaj Nivie» užo raskazvaŭ viadomy doktar-infiekcyjanist Mikita Sałaviej.
Ale ci moža čałaviek adnačasova chvareć na hryp i kavid?
«Kali jon nie pryščepleny ad abodvuch zachvorvańniaŭ, to jość ryzyka atrymać mikst-infiekcyju, to-bok zarazicca dvuma virusami adnačasova, — raskazaŭ nam miedyk. — U hetym vypadku dva virusy buduć patencavać dziejańnie adzin adnaho, i zachvorvańnie projdzie ciažej, čym kali b heta byli hryp abo kavid paasobku».
Nakolki realna, znachodziačysia ŭ stanie chvaroby, dakładna raźmiežavać dva zachvorvańni?
«Tak, adroźnieńni jość. I pra ich kazaŭ Mikita Sałaviej. Ale kali čałavieku ŭžo drenna, to vyrazna zrazumieć, što ŭ ciabie hryp i kavid adnačasova, samastojna vielmi składana, — kaža miedyk. — Pra najaŭnaść u čałavieka mikst-infiekcyi my daviedvajemsia, jak praviła, u stacyjanary, kali pravodzim testavańnie na abodva zachvorvańni ŭ vypadku ciažkaj chvaroby.
Kali ž čałaviek znachodzicca na ambułatornym lačeńni, to biez testa na kavid adhadać, što ŭ jaho za virus, budzie sapraŭdy składana. Usio ž u hrypa i kavida vielmi padobnaje ciačeńnie zachvorvańnia.
U paliklinikach, kali tudy źvierniecca čałaviek z tempieraturaj, taksama naŭrad ci pačnuć dakładna raźbiracca, z čym da ich pryjšoŭ pacyjent — z hrypam ci za kavidam, abo z tym i druhim adnačasova. Adpraviać adrazu ŭ «čyrvonuju zonu», a dalej užo budzie bačna. Kali test na kavid jamu ŭsie ž zrobiać i jon budzie admoŭny, chutčej za ŭsio, vystaviać VRVI i adpraviać na balničny».
Jakoje lačeńnie?
Patłumačyli miedyki i toje, nakolki śpiecyfičnym pavinna być lačeńnie pry dvuch zachvorvańniach adnačasova i nakolki niebiaśpiečnaj moža być situacyja, kali niejkaha z hetych zachvorvańniaŭ čałaviek usio ž nie raspaznaje, a lekary nie dyjahnastujuć.
«Lačeńnie pavinna prachodzić zhodna z pratakołam. Zychodziačy z analizaŭ i kliničnaj karciny, mohuć dadavacca tyja ci inšyja śpiecyfičnyja preparaty.
Jość niebiaśpieka, što miedyk abo pacyjent mohuć niapravilna dyjahnastavać zachvorvańnie. Heta značyć, čałaviek moža pačać prymać supraćhrypoznyja preparaty, ale kali ŭ jaho kavid, jany prosta nie daduć efiektu.
Važna razumieć: padbor preparataŭ pavinien być indyvidualnym i karektavacca ŭ zaležnaści ad stanu chvoraha».
Važna!
Miedyki nastojvajuć: samy efiektyŭny sposab papiaredzić zachvorvańnie ci ciažkaje ciačeńnie COVID-19 — heta vakcynacyja.
Pryščapicca ŭ Biełarusi siońnia možna amal va ŭsich paliklinikach i balnicach krainy, u punktach vakcynacyi na niekatorych stancyjach mietro, u handlovych centrach.
U liku dastupnych biełarusam supraćkavidnych vakcyn siońnia — rasijskija «Sputnik V» i «Sputnik Łajt», kitajski Vero Cell («Sinafarm»).
Dniami ŭ Biełaruś zavieźli taksama rasijski «KaviVak» — usiaho 300 tysiač doz. Ministerstva achovy zdaroŭja vydała dazvoł na jaho prymianieńnie. U niekatorych paliklinikach vakcynacyja «KaviVakam» užo pačałasia.
Ludzi taŭściejuć pa dvuch typach: abo jabłyk, abo hruša. Što horš? Raskazvaje doktar
Čamu šviedy jaduć cukierak pa kiłahramie na siamju ŭ tydzień, a zuby ŭ ich adny z najlepšych u Jeŭropie
Jak nie chvalavacca i nie vyharać. Parady psichołaha praduktyŭnaści, jaki vykładaje amierykanskim vajskoŭcam
