Polskija śpiecsłužby pracavali na vyzvaleńnie paniavolenych narodaŭ byłoha SSSR. Takija źviestki ŭtrymlivajucca ŭ rassakrečanych archivach Słužby vonkavaj raźviedki Rasii (SVR).
Pa słovach składalnika zboru dakumientaŭ «Sakrety polskaj palityki. 1935‑1945» hienierała Lava Sockava, jakoha cytuje RIA «Naviny», u archivach znajšlisia dakumienty polskaha Hienštaba, u jakich havorycca pra stvareńnie na Ukrainie, u Siaredniaj Azii i na Kaŭkazie śpiecpadraździaleńniaŭ pa pracy z nacyjanalnymi mienšaściami. Praca była nakiravana na padtrymku niezaležnickich ruchaŭ. Sockaŭ dadaŭ, što hetyja dziejańni kaardynavała arhanizacyja «Pramietej», štab‑kvatera jakoj raźmiaščałasia ŭ Paryžy.
Vyjście zboru dakumientaŭ prymierkavanaje da 70‑hodździu pačatku Druhoj suśvietnaj vajny. Leŭ Sockaŭ śćviardžaje, što ciapierašniaje kiraŭnictva Polščy moža nie vałodać apublikavanymi źviestkami, pakolki ŭ hady vajny ŭsie polskija archivy byli vyviezieny niamieckimi nacystami. Rasija ž vałodaje hetymi dakumientami, pakolki ŭ toj pieryjad u savieckaj vyviedki była dobra raźvita ahienturnaja słužba ŭ Varšavie. U śpis rassakrečanych dakumientaŭ uvajšli telehramy dypmisij, daniasieńni vajennych ataše, słužbovyja zapiski i zapisy hutarak, a taksama papiery, źviazanyja z polska‑brytanskimi adnosinami i spravazdača ab pieramovach Hiermana Hierynha z kiraŭnictvam Polščy.
Biez znajomstva z knihaj ciažka skazać, nakolki možna daviarać źviestkam savieckaj ahientury tych časoŭ. Akurat u 1930‑ia SSSR nakryła chvala špijonamanii, miljony ludziej byli aryštavanyja za suviaź z zamiežnymi raźviedkami, u tym liku łatvijskaj ci japonskaj.Ź ich vybivali falšyvyja pakazańni. Vidavočna, što padobny palityčny zakaz vykonvała i rasijskaja vyviedka.
