Były kamandzir pałka patrulna-pastavoj słužby milicyi UUS Homielskaha abłvykankama i jaho namieśnik asudžanyja na try i dva hady adpaviedna.
Sud Savieckaha rajona Homiela 14 vieraśnia abviaściŭ pryhavor u dačynieńni da byłych kamandzira pałka patrulna-pastavoj słužby milicyi UUS Homielskaha abłvykankama i jaho namieśnika. Sud pryhavaryŭ byłych milicyjanieraŭ da pazbaŭleńnia voli terminam na try hady z adterminoŭkaj vykanańnia pryhavoru na dva hady. Sudovyja słuchańni prachodzili ŭ zakrytym režymie. Pra sutnaść kryminalnaj spravy BiełaPAN paviedamiŭ staršy pamočnik prakurora Savieckaha rajona Jaŭhien Dziadkoŭski, jaki vystupaŭ na sudzie dziaržaŭnym abvinavaŭcam.
Kryminalnaja sprava ŭ dačynieńni da byłych kamandzira pałka PPSM i jaho namieśnika była raspačata ŭ studzieni 2009 hoda. Milicyjaniery padazravalisia ŭ tym, što z 2004 hoda pa 2008-y niezakonna naličvali, a zatym zabirali ŭ svaich padnačalenych premii. Havorka išła pra 16 młn. rubloŭ. Vosieńniu 2008 hoda va ŭpraŭleńnie ŭłasnaj biaśpieki MUS źviarnuŭsia adzin z supracoŭnikaŭ PPSM, jaki paviedamiŭ ab niezakonnych dziejańniach kamandzira. Pravierka paćvierdziła infarmacyju. U kancy 2008 hoda kamandzir pałka byŭ zvolnieny z orhanaŭ unutranych spraŭ.
U dačynieńni da kamandzira i namieśnika byli raspačaty spravy pa č. 3 art. 210 KK (kradziež šlacham złoŭžyvańnia słužbovymi paŭnamoctvami) i pa č. 2 art. 426 KK (pieravyšeńnie ŭłady abo słužbovych paŭnamoctvaŭ, učynienaje z karyślivaj abo inšaj asabistaj zacikaŭlenaści). Sutnaść abvinavačańnia ŭ tym, što milicejskija načalniki niezakonna naličvali premii supracoŭnikam, a zatym hrošy zabirali. Na śledstvie i ŭ pracesie suda kamandzir i jaho namieśnik śćviardžali, što premii išli na patreby pałka PPSM. Jak udałosia vyśvietlić BiełaPAN, pad «patrebami pałka» padrazumiavajecca kupla škłopakietaŭ, kandycyjanieraŭ, žaluzi, padarunkaŭ dzieciam supracoŭnikaŭ pałka na Novy hod, arhanizacyja sałodkich stałoŭ i bankietaŭ.
Sud pryjšoŭ da vysnovy, što kiraŭniki pałka vinavatyja ŭ niezakonnym naličeńni premii (h.zn. pieravysili ŭładu), ale nievinavatyja ŭ kradziažach (h.zn. u tym, što hetyja hrošy byli prysvojeny). Takim čynam, pa č. 3 art. 210 byłyja milicyjaniery byli poŭnaściu apraŭdany, a pa č. 2 art. 426 — pryznanyja vinavatymi.
Na sudzie dziaržabvinavaŭca vykazaŭ mierkavańnie, što byłyja milicyjaniery vinavatyja ŭ kradziažach šlacham złoŭžyvańnia słužbovymi paŭnamoctvami, ich vina ŭ hetym dakazana, i prasiŭ pryznačyć dla ich pakarańnie ŭ vyhladzie pazbaŭleńnia voli na 7 hadoŭ.
«Prakuratura nie zhodnaja z pryhavoram suda, i my pryniasiom kasacyjny pratest. Miarkujem, što pryhavor miakki ŭ častcy ich apraŭdańnia pa artykule za kradziažy», — vykazaŭ dumku Dziadkoŭski.
