Dla dasiahnieńnia dadatnaha salda ŭ źniešnim handli zusim nie abaviazkova stymulavać ekspart. Dastatkova pastavić zasłonu impartu. Albo pastrašyć niepryjemnaściami imarcioraŭ.
Kantralavać impart u Savieckim Sajuzie nie ŭjaŭlała nijakaj prablemy. U krainie, jakaja zajmała šostuju častku ziamnoj suchmieni, zavaznyja tavary možna było nabyć tolki ŭ admysłovych kramach – «biarozkach». Atavarvacca tam mahła tolki niaznačnaja katehoryja ludziej, jakaja mieła poruč z savieckimi rublami jašče i amerykanskija dalary. Tyja ž, kamu nie davodziłasia pryvozić z-za miažy valutu, u «biarozki» nie traplali, a značycca – radavalisia tavaram savieckaj vytvorčaści.
«Adčuć roźnicu» biełarusam paščaściła paśla padzieńnia «žaleznaj zasłony», kali tavary zamiežnaha pachodžańnia stali aktyŭna zapaŭniać palicy ajčynnych kramaŭ. Praŭda, siońnia biełaruski ŭrad na znak kłopatu pra ajčynnaha vytvorcu viartaje krainu «nazad u minułaje» i presinhuje impart.
Na siońniašni dzień ministerstva handlu padrychtavała «čorny śpis» tavaraŭ, jakija, na dumku čynoŭnikaŭ, uvoziacca na ŭnutrany rynak nieabhruntavana. Da liku impartnych tavaraŭ, uvoz jakich minitsterstva prapanuje značna abmiežavać, adniesienyja charčovyja pradukty (fruktovyja soki, biezałkaholnyja napoi, makarony), a taksama abutak, dyvany i prasy. Niaciažka zdahadacca, što pryznańnie pieraličanaj pradukcyi ŭ pastanovie ŭradu «nieabhruntavanym impartam» pryviadzie da jaje ŭdaražańnia na ŭnutranym rynku. Ale heta nie adziny siurpryz, jaki sioleta čakaje impart na Biełarusi. «U metach zabieśpiačeńnia ekanamičnaj biaśpieki dziaržavy i abarony intaresaŭ hramadzianaŭ RB» sioleta ŭ śniežni ŭvozimyja ŭ krainu kava, harbata, abutak i mabilnyja telefony buduć markiravacca kantrolnymi znakami. Kab pramarkiravać uvozimyja pazycyi tavaraŭ, imparcioram daviadziecca nabyć za ŭłasny košt abstalavańnie dla nalepki marak, a taksama sami identyfikacyjnyja znaki. Tym, chto ryzyknie realizavać niemarkiravanyja tavary, pahražaje štraf z kanfiskacyjaj uviezienaj pradukcyi.
Asabliva napružanym dla imparcioraŭ abiacaje być 2007 hod. Urad naleta prapanuje pryniać novuju redakcyju zakonu «Pra aboronu pravoŭ spažyŭcoŭ». Zhodna z dakumentam, imparcior budzie nieści adkaznaść za jakaść pradadzienaha tavaru navat paśla skančeńnia terminu jaho harantyjnaha absłuhoŭvańnia. «Dadatkovaja adkaznaść», jakuju ŭrad prapanuje «ŭzvalić» na imparcioraŭ, prymusić apošnich zadumacca pra asartyment tavaraŭ. Prymusam davać faktyčna pažyćciovuju harantyju na pradadzienyja tavary biełaruski ŭrad u čarhovy raz syhnalizuje, što pradavać, jak i kuplać, lepš biełaruskaje.
Barys Malinoŭski, Euramost.org
