Ilustracyjny zdymak. Fota: «Naša Niva»
Abaviazkovaja dezynfiekcyja transpartu va ŭsich punktach propusku na miažy Biełarusi i ES dziejničaje z 1 vieraśnia. Z 16 vieraśnia pasłuha stała płatnaj.
- Kiroŭca lehkavoha aŭto zapłacić za heta 2 rubli.
- Kiroŭca aŭtobusa — 30 rubloŭ.
- Kiroŭca hruzavika — 95 rubloŭ.
Chto budzie zarablać na dezynfiekcyi?
Pasłuhi akazvaje TAA «BiełHłobałHarant», suzasnavalnikam jakoha źjaŭlajecca siabar Łukašenki, biznesmien i były staršynia Biełaruskaj tenisnaj fiederacyi Siarhiej Ciacieryn.
Kampanija była zarehistravanaja i pastaŭlenaja na padatkovy ŭlik pry kancy 2013 hoda. Da 2012 hoda Ciacieryn zajmaŭ pasadu vice-prezidenta Nacyjanalnaha alimpijskaha kamiteta, prezidentam NAK byŭ sam Alaksandr Łukašenka.
Asnoŭnym vidam dziejnaści TAA «BiełHłobałHarant» paznačany «Aptovy handal kavaj, harbataj, kakavaj i śpiecyjami. AKED-46370».
Ale intaresy TAA «BiełHłobałHarant» nie abmiažoŭvajucca aptovym handlem vyšej apisanaj hrupy tavaraŭ. U 2015 hodzie «BiełHłobałHarant» arhanizavaŭ pastaŭku ŭ Biełaruś kańjakoŭ, viski, vinaŭ i viermutaŭ. Kampanija taksama apošnija hady zajmajecca i budaŭničym biznesam.
Ciacieryn niaredka źjaŭlajecca ŭ atačeńni Łukašenki. Tak, jon razam z Alaksandram Łukašenkam na kamieru piŭ čarku za pieramohu tenisistki Aryny Sabalenka. Jon taksama biŭ drovy razam z kiraŭnikom Biełarusi — kali łukašenkaŭskaja prapahanda śćviardžała, što jeŭrapiejcy zamiarzajuć biez rasijskich enierhanośbitaŭ. Ciapier mienavita jamu davieryli admyvać aŭtamabili na miažy.
Alaksandr Łukašenka razam ź Siarhiejem Ciacierynym adznačajuć pieramohu tenisistki Aryny Sabalenka, 2023 hod. Fota: skrynšot ź videa
Kolki hrošaj moža prynosić biznes na miažy?
Kab daviedacca, pra jakija ličby moža iści havorka, źvierniemsia da aficyjnych danych Dziaržpahrankamiteta ab kolkaści transpartnych srodkaŭ, jakija ciaham sutak pierasiakali miažu Biełarusi i ES.
Zhodna z danymi, jakija publikujuć u aficyjnym kanale Dziaržaŭnaha pahraničnaha kamiteta, u siarednim za sutki ź Biełarusi ŭ ES prajezdžaje kala 1200 hruzavikoŭ i kala 2000 lehkavych aŭto. Asobnaj statystyki pa aŭtobusach niama. Vierahodniej za ŭsio, jany ličacca razam ź lehkavym transpartam.
Takim čynam atrymlivajecca, što za dzień ź lehkavoha transpartu AAT «BiełHłobałHarant» maje kala 4000 rubloŭ ci kala $1200 pa biahučym kursie štodnia. Za miesiac musić vyjści kala 120 tysiač rubloŭ, abo kala $36 500. Suma ŭ miežach krainy nievialikaja, bo košt dezynfiekcyi transpartnaha srodku, jaki padpadaje pad katehoryju V, VIE — usiaho 2 rubli.
Za dezynfiekcyju aŭtobusa treba vykłaści ŭžo 30 rubloŭ. Dakładnaja kolkaść aŭtobusaŭ, jakaja pierasiakaje miažu, nieviadomaja. Ale možna mierkavać, što za sutki maleńkich maršrutak i vialikich aŭtobusaŭ prajazdžaje samaje małoje 100 štuk. A heta jašče 3000 rubloŭ (kala $900) na rachunak TAA «BiełHłobałHarant» štodnia. Za miesiac heta kala 27 tysiač dalaraŭ.
Daražej za ŭsio kaštuje dezynfiekcyja hruzavoha transpartu, jaki padpadaje pad katehoryi S i SIE. Košt pasłuhi — 95 rubloŭ.
Źviestki ab kolkaści hruzavikoŭ, jakija prajechali praź miažu ŭ adnym kirunku. Krynica: telehram-kanał «Pahraničny kamitet Biełarusi»
Za sutki praź miažu ŭ siarednim prajazdžaje bolš za 1200 hruzavikoŭ. Atrymlivajecca, što ciaham sutak na dezynfiekcyi hruzavych aŭto firma nabližanaha da Łukašenki biznesmiena budzie atrymlivać kala 114 tysiač rubloŭ, ci kala 35 tysiač dalaraŭ. A heta ŭžo 3,42 miljona rubloŭ, ci kala 1 miljona 50 tysiač dalaraŭ za miesiac.
Takim čynam atrymlivajecca, što ciaham hoda na rachunak TAA «BiełHłobałHarant» u siarednim budzie pastupać kala 41 miljonaŭ rubloŭ, ci kala 12,5 miljonaŭ dalaraŭ.
Naturalna, što havorka idzie pra sumu «brudnymi» biez uliku vydatkaŭ na padatki, srodki dla dezynfiekcyi, apłatu supracoŭnikam, absłuhoŭvańnie abstalavańnia i h. d. Ale ŭ kožnym razie suma ŭražvaje.
Siarhiej Ciacieryn i Mikałaj Łukašenka ŭ 2014 hodzie. Fota: BiełTA
Jak bačym, asnoŭnyja pastupleńni buduć iści mienavita ad hruzavoha transpartu. I tut varta adznačyć, što abaviazkovaja dezynfiekcyja za 95 rubloŭ — nie adzinaja sumnieŭnaja krynica vydatkaŭ dla hruzapieravozčykaŭ. Reč u tym, što hruzavy transpart, jaki jedzie da nas ź ES, musić karystacca navihacyjnaj płombaj, arenda jakoj kaštuje 10 bazavych vieličyń — heta jašče 370 rubloŭ, ci kala 110 dalaraŭ ZŠA z kožnaha hruzavika. Padrabiaźniej pra navihacyjnyja płomby my pisali raniej.
Na inšych jeŭrapiejskich miežach dezynfiekcyja transpartu nie pravodzicca, bo hetaja pracedura pazbaŭlenaja praktyčnaha sensu.
