15 žniŭnia 2006 h. va ŭračystaść Uniebaŭziaćcia Najśviaciejšaj Panny Maryi kala kaścioła śviatoha Maćvieja ŭ Raŭbičach, dzie ciapier znachodzicca muziej, adbyłasia śviataja Imša, jakuju cielebravaŭ kancler kuryi Minska-Mahiloŭskaj archidyjacezii ks. Juryj Kasabucki. Probašč raŭbickaj parafii a. Ihar Łašuk SDB maliŭsia ŭ intencyi viartańnia kaścioła śviatoha Maćvieja, a taksama za ŭsich parafijanaŭ i za supakoj dušaŭ ich pamierłych rodnych i blizkich.
Padčas śviatoj Imšy ks. Juryj Kasabucki aśviaciŭ šaty i 2 karony dla kopii cudatvornaha abraza Maci Božaj Karmilicy (Lactasti sacro ubere). Ciapier kopija abraza, jaki byŭ adnoŭleny zhodna z apisańniami ŭ archiŭnych dakumientach, maje taki ž vyhlad, jak i jaho staražytny aryhinał.
Šaty i karony, prajekt jakich byŭ raspracavany architektaram Alaksiejem Jaromienkam, — vynik doŭhaj i karpatlivaj pracy juvielira Ivana Rusaka. Materyjałam dla ich vykanańnia stali rečy z kaštoŭnych mietałaŭ, achviaravanyja viernikami raŭbickaj parafii, a taksama minskaj parafii śviatoha Jana Chryściciela. Dla kožnaha z achviaradaŭcaŭ śviatary prasili apieki Maci Božaj Karmilicy.
Los kaścioła śviatoha Maćvieja ŭ Raŭbičach, uźviedzienaha na achviaravańni viernikaŭ u 1862 h. (parafija tut dziejničaje z 1650 h.), na praciahu ŭsioj historyi jaho isnavańnia byŭ składanym. U 1866 h. śviatynia była zabrana i pieraroblena ŭ pravasłaŭnuju carkvu. U 1917 h. viernuty katalikam kaścioł pierastaje dziejničać z-za pieraśledu relihii z boku savieckaj ułady. U časy vajny śviatyni byli naniesieny značnyja paškodžańni, a ŭ 1930 h. źniesiena kaplica na mohiłkach U 1978 h. kaścioł byŭ adrestaŭravany i addadzieny pad muziej biełaruskaha narodnaha mastactva.
Pa inicyjatyvie probašča parafii a. Ihara Łašuka kala kaścioła śviatoha Maćvieja płanujecca pabudavać zvanicu, dzie vierniki mahli b źbiracca na malitvu da taho času, pakul śviatynia nie budzie viernuta jaje sapraŭdnym uładalnikam. Kožny 15-y dzień miesiaca praz zastupnictva Maci Božaj Karmilicy ŭznosiacca malitvy za ludziej dobraj voli, jakija svajoj achviaraj i malitvaj dapamahajuć ździajśnieńniu hetaj vysakarodnaj spravy.
