Hrodzienski dziaržaŭny univiersitet nievypadkova nosić imia kłasika biełaruskaj litaratury Janki Kupały. Horad ciesna źviazany ź jaho žyćciovym šlacham i tvorčaściu.
Paet nieadnojčy byvaŭ u Harodni. Data apošniaj pajezdki dakładna viadomaja — 27—28 sakavika 1941 hoda. Pra heta śviedčać uspaminy Vasila Vitki «Sustrečy, jakija źbierahła pamiać».
A ŭpieršyniu pra paeta pačuli tut sto hadoŭ tamu. Dziakujučy kulturna-aśvietnaj dziejnaści Hrodzienskaha hurtka biełaruskaj moładzi (1910—1913), jaki aktyŭna prapahandavaŭ biełaruskuju kulturu, šyrokaj hramadzie haradziencaŭ byli prapanavany jaho tvory. Na viečarynach čytalisia vieršy Janki Kupały, vykonvalisia pieśni na jaho słovy. Pra heta śviedčać i ŭspaminy dziajački hurtka Zośki Vieras.
Vučni pieršaj biełaruskaj škoły ŭ Harodni, što paŭstała ŭ 1916 hodzie, vyvučali tvory Janki Kupały. Škoła mieściłasia na vulicy Mastavoj, 9 pry Barysahlebskim manastyry. A nastaŭničali ŭ joj Tekla Stanišeŭskaja i Alaksandr Hrykoŭski.
U 1919 hodzie padčas dziejnaści Dramatyčnaha hurtka Hramady biełaruskaj moładzi 19 vieraśnia ŭpieršyniu ŭ Harodni byŭ pastaŭleny śpiektakl pa pjesie «Paŭlinka», u jakim hałoŭnuju rolu vykonvała Paŭlina Miadziołka.
Asobnaja staronka kulturnaha žyćcia horada źviazana ź dziejnaściu Hrodzienskaha abłasnoha dramatyčnaha teatra, u repiertuary jakoha pieryjadyčna źjaŭlajucca tvory kłasika. Siońnia heta dva śpiektakli — «Raskidanaje hniazdo» i «Prymaki». Dva śpiektakli pavodle Kupałavych tvoraŭ z pośpiecham iduć na scenie Hrodzienskaha abłasnoha teatra lalek — pjesa «Tutejšyja» i «Paema biez słoŭ» (pavodle dramatyčnaj paemy «Son na kurhanie»).
Vobraz paeta zaŭsiody natchniaŭ haradzienskich tvorcaŭ na stvareńnie vieršaŭ. Pačynalnikam pryniomanskaj paetyčnaj kupalijany staŭ Michaś Vasilok. Piśmieńnicy Zinaidzie Bandarynaj, što źjaŭlajecca aŭtarkaj knihi pra Kupału «Oj, rana na Ivana…» i narysa «Pa kupałaŭskich miaścinach», naležyć vierš «Pa kupałaŭskich ściežkach». Niekalki vieršaŭ pryśviacili narodnamu paetu Danuta Bičel, Jurka Hołub, Anatol Brusievič.
U Hrodzienskim piedinstytucie ŭ 1958—1965 hadach štohod pravodzilisia Kupałaŭskija čytańni. Jany byli adnoŭleny jak navukovaja kanfierencyja ŭ 1995, jakaja raz na dva hady źbiraje kupałaznaŭcaŭ u Harodniu. Čarhovaja kanfierencyja prajšła sioleta 24—25 lutaha. Na joj prahučała ažno 89 dakładaŭ.
