Kiraŭnik Centrvybarkama Biełarusi nie vyklučaje praviadzieńnia prezidenckich vybaraŭ vosieńniu 2010 hoda.
Pra heta Lidzija Jarmošyna zajaviła ŭ intervju BiełaPAN.
U adpaviednaści z zakanadaŭstvam prezidenckija vybary pavinny być pryznačanyja nie paźniej, čym za piać miesiacaŭ i pravodzicca ŭ niadzielu nie paźniej, čym za dva miesiacy da zakančeńnia terminu paŭnamoctvaŭ papiaredniaha prezidenta. Takim čynam, krajni termin praviadzieńnia prezidenckich vybaraŭ — 6 lutaha 2011 hoda.
«Viadoma, vybary było b zručniej pravieści da Novaha hoda. Byŭ by inšy nastroj u hramadstvie», — ličyć Lidzija Jarmošyna.
Razam z tym staršynia Centrvybarkama padkreśliła, što ź joj adnosna daty prezidenckich vybaraŭ «nichto nie raiŭsia». «Data prezidenckich vybaraŭ — pytańnie palityčnaje. Ale Centrvybarkam pavinien razhladać pytańnie praviadzieńnia vybaraŭ u tym liku ŭ praktyčnaj płoskaści. Mnie b nie chaciełasia ŭžo ŭ vieraśni prystupać da aktyŭnaj pracy,
ale ja b z razumieńniem pastaviłasia da pryznačeńnia vybaraŭ na vosień», ‑‑ skazała Jarmošyna.
Jana taksama adznačyła, što prezidenckija vybary pryznačaje parłamient. Pavodle słovaŭ kiraŭnika CVK, kali nie pravodzić pazačarhovych parłamienckich siesij, to data vybaraŭ nie moža być pryznačanaja raniej za kastryčnik (pavodle zakona 2 kastryčnika pačynajuć pracu vosieńskija siesii parłamienta).
Na dumku analitykaŭ, pryznačeńnie prezidenckich vybaraŭ vosieńniu vyhadna ŭładam, bo zbłytaje karty palityčnych apanientaŭ Alaksandra Łukašenki.
Apazicyja ciapier raźjadnanaja, a tamu daterminovy start vybarčaj kampanii moža dać istotnuju pieravahu dziejnamu kiraŭnika dziaržavy, ličać palitołahi.
Akramia taho, analityki nie vyklučajuć ŭpłyvu ekanamičnych faktaraŭ pry naznačeńni daty prezidenckich vybaraŭ. Na ich dumku,
paharšeńnie supracoŭnictva z Rasiejaj moža pryvieści da rezkaha padaražańnia enierhanośbitaŭ, a značyć, i rostu koštaŭ u pačatku 2011 hoda. U takich umovach rejtynh Łukašenka moža istotna źnizicca.
Varta adznačyć, što precedent z pryznačeńniem prezidenckich vybaraŭ raniej mierkavanaha termina ŭžo mieŭ miesca. U 2006 hodzie vybary prezidenta Biełarusi
pavinny byli adbycca letam, adnak ich datu pieramiaścili na sakavik. Heta stała niečakanaściu dla apazicyi, pradstaŭniki jakoj zajaŭlali, što im nie chapiła času na raskrutku svajho kandydata.
