Fota AFP
Ambasadar Biełarusi ŭ Kirhizstanie Viktar Dzienisienka i ŭsie supracoŭniki ambasady adklikanyja ŭ Miensk.
Pradstaŭniki biełaruskaha Ministerstva zamiežnych spraŭ raniej paviedamlali pra toje, što robiacca zachady dziela biaśpieki supracoŭnikaŭ biełaruskaj ambasady i ich siemjaŭ u Biškieku.
Peŭny čas tamu Kirhizstan pakinuli spačatku dzieci supracoŭnikaŭ, potym žančyny, a ciapier adkamandziravanyja supracoŭniki‑mužčyny. Pasoł Biełarusi ŭ Kirhizstanie Viktar Dzienisienka adklikany dla kansultacyj.
Pamiaškańnie ambasady achoŭvajecca miascovymi orhanami ŭłady.
Pavodle pres-sakratara MZS Biełarusi Andreja Savinych, nichto nia moh harantavać biaśpieku biełaruskich dyplamataŭ va ŭmovach Biškieku. Spadar Savinych taksama skazaŭ, što ŭ źviazku z hetym niama mahčymaści reahavać na pikiety, jakija pravodziacca kala budynka biełaruskaj ambasady.
«Z ulikam sytuacyi, jakaja skłałasia, pasoł Respubliki Biełaruś byŭ adklikany ŭ Miensk dla kansultacyj. Taksama supracoŭniki ambasady byli adkamandziravanyja ŭ stalicu. Heta abumoŭlena pytańniami biaśpieki. Dla nas biaśpieka našych hramadzianaŭ źjaŭlajecca hałoŭnym pytańniem. Chaču padkreślić, što miera hetaja časovaja, źviazanaja z prablemami harantavańnia fizyčnaj biaśpieki našych dyplamataŭ. Jany viernucca da vykanańnia svaich abaviazkaŭ, jak tolki sytuacyja narmalizujecca. Našy dyplamaty adklikanyja nie jak miera ŭ adkaz, nie jak demarš, a vyklučna ŭ metach biaśpieki našych ludziej».
Pavodle spadara Savinych, išli pahrozy na adras kankretnych asobaŭ. Jon adznačyŭ, što havorka idzie pra ekstremisckija elementy, jakich nichto nie kantraluje.
«Kali b sytuacyja ŭ Biškieku była narmalnaj z punktu hledžańnia biaśpieki, to naša ambasada praciahvała b pracu. Heta vielmi važny momant, bo my ličym, što dačynieńni pamiž krainami nie pavinny stać zakładnikami ciapierašniaj sytuacyi. Siabroŭski charaktar stasunkaŭ pamiž našymi narodami nia moža być niejak pastaŭleny pad pahrozu».
Dyplamatyčnyja adnosiny pamiž Biełaruśsiu i Kirhizstanam, adnak, praciahvajucca.
