Pakul u Biełarusi viešańnie zamočkaŭ na most u znak svajho daviečnaha kachańnia — ekstravahantny modny rytuał, dyk u Paryžy padobnaja źjava ŭžo trapiła pad aznačeńnie škodnaj.
Učora haradskija ŭłady Paryžu pačali zdymać kala 2000 minijaturnych zamočkaŭ z masta Pon Dezar, jaki ličycca «mastom zakachanych».
Niekatoryja paryžcy dy hości francuzskaj stalicy miarkujuć, što haradskija ŭłady «burać ramantyku». Kažuć, što luboŭnyja zamočki «moža, i nie tvory mastactva, ale jany častka paryžskich tradycyjaŭ». U dadatak jany vykazvajuć dumku, što hety zachad haradskich uładaŭ moža paškodzić imidžu «stalicy kachańnia».
U procivahu hetamu mierkavańniu presavy sakratar haradskoj rady Paryžu zajaŭlaje, što jak raz zamočki, pieravažna zaržaviełyja i zbućviełyja, psujuć abličča histaryčnych słavutaściaŭ.
Užo šmat hadoŭ most Pon Dezar źjaŭlajecca mahnitam dla zakachanych par. Pavodle zaviadzionki kachanki vyhraviroŭvajuć na korpusie zamka svaje imiony abo inicyjały, pračułyja słovy kachańnia, sercejki, dy inšuju luboŭnuju simboliku, a potym zamykajuć zamki na parenčach abo papiaročkach masta.
