Spartsmienki z 29 krain voźmuć udzieł u etapie Kubka śvietu pa mastackaj himnastycy BelSwissBank. Spabornictvy projduć 21—23 maja ŭ minskim Pałacy sportu, paviedamiła hałoŭny trenier biełaruskaj zbornaj Iryna Laparskaja na pres‑kanfierencyi 18 maja.
Pieršapačatkova na etap zajavilisia 34 krainy, ale zatym pa roznych pryčynach niekatoryja admovilisia, u tym liku Hiermanija, Italija i Bałharyja. Apošniaj paćvierdziła svaju zajaŭku Vieniesueła, adznačyła Laparskaja.
Himnastki paviaduć baraćbu ŭ indyvidualnym i hrupavym praktykavańni (10 zbornych). «Upieršyniu paśla Alimpijskich hulniaŭ u Piekinie ŭ hrupavym praktykavańni vystupić Kitaj», — skazała hałoŭny trenier.
Viečaram 21 maja adbudziecca mižnarodny turnir »Chrustalnaja ruža» siarod junijorak 1995—1997 h.n. z 14 dziaržaŭ. Ad kožnaj krainy vystupić pa adnoj spartsmiency, ad haspadaroŭ — čatyry.
Etap zavieršyć tradycyjnaje šou zorak suśvietnaj himnastyki.
U im vystupiać pieramožcy i pryziory etapaŭ Kubka śvietu. Pavodle słoŭ Laparskaj, sioleta ŭ šou novy režysior z novaj kamandaj, i mnohaje budzie ŭpieršyniu.
Uvachod na spabornictvy biaspłatny, bilety na šou kaštujuć 5, 10 i 15 tys. rubloŭ.
Laparskaja zaprasiła hledačoŭ naviedać etap Kubka śvietu i adznačyła, što heta jašče bolš cikava, čym šou zorak, bo prysutničaje spabornicki momant. »Chaciełasia b, kab zała była zapoŭniena, kab heta było dobraachvotna», — skazaŭ hałoŭny trenier zbornaj.
Etap Kubka śvietu pa mastackaj himnastycy projdzie ŭ Minsku treci raz.
