Słaviency dobra pačali hulniu. Valter Birsa ŭžo na trynaccataj chvilinie adkryŭ lik. Słavieniec pabačyŭ, što hałkipier amierykancaŭ Hovard daloka vyjšaŭ z varot, čym i skarystaŭsia, pierakinuŭšy jaho.
«Zorna‑pałasatyja» pajšli vialikimi siłami napierad, ale atrymali jašče adzin hoł u svaju bramu. Złatan Lubijankič padvoiŭ lik pierad śvistkom na pierapynak.
Pieramoha dazvoliła b Słavienii stać pieršaj zbornaj, jakaja trapiła ŭ 1/8 finała, ale amierykancy prademanstravali svoj duch.
Spačatku lider ZŠA Łendan Donavan rasstralaŭ ź blizkaj adlehłaści Samira Chandanaviča. A za vosiem chvilin da finalnaha śvistka syn hałoŭnaha treniera amierykancaŭ Majkł Bredli raŭnavahu adnaviŭ — 2:2.
Amierykancy zabili jašče adzin hoł, ale malijski sudździa sprečna jaho nie zaličyŭ.
Ciapier u hrupie nastupnaje stanovišča: Słavienija — 4 punkty (2 hulni), ZŠA — 2 (2), Anhlija — 1 (1), Ałžyr — 0 (0).
Ničyja značna paharšaje šancy słaviencaŭ na vychad u płej‑of.
A 21:30 hulajuć Anhlija i Ałžyr.
Jovanavič zabiŭ pieramožny hoł.
Niečakany vynik pryniesła hulnia zbornych Sierbii i Niamieččyny. Bałkanskaja kamanda atrymała minimalnuju pieramohu.
Pačatak matču ničym asablivym nie zapomniŭsia. Chiba što ispanski arbitr Maljenka davaŭ papiaredžańni i tym, i tym. Niemcam u hetym płanie pašancavała mieniej. Užo na 37‑aj chvilinie hulni za druhuju žoŭtuju kartku byŭ vydaleny forvard Hiermanii Mirasłaŭ Kłoze.
A praz chvilinu lik u hulni byŭ adkryty. Jovanavič lepš za astatnich zaryjentavaŭsia ŭ štrafnoj Niamieččyny, i prosta rasstralaŭ Manuela Nojera.
Kamanda Jachima Lova kinułasia i šancy byli. U pačatku druhoha tajma Łukaš Padolski zaparoŭ niekalki viernych momantaŭ. A potym na dapamohu Hiermanii pryjšoŭ sierbski abaronca.
Niemańja Vidzič u absalutna biaskryŭdnaj situacyi syhraŭ rukoj u svajoj štrafnoj. Sudździa byŭ biaźlitasny — pienalci. Bić jaho vyklikaŭsia ŭsio toj ža Padolski.
Ale jamu ŭ hety viečar katastrafična nie šancavała. Uładzimir Stojkavič adbiŭ adzinaccacimietrovy. Jon sapraŭdny hieroj hetaha pajadynku.
U kancy sustrečy sierby byli bližejšymi da taho, kab zrabić lik bolšym, čym niemcy, kab adyhracca.
Ciapier u hrupie D nastupnaja situacyja: Hana — 3 punkty (1 hulnia), Niamieččyna, Sierbija — 3 punkty (2 hulni), Aŭstralija — 0 (1).
