«Čytać pa-biełarusku i pra Biełaruś!» — ličać stvaralniki internet-biblijateki «Kamunikat»
1. Jak usio pracuje
Vy zachodzicie na adras kamunikat.com i pampujecie sabie na kamputar abo čytajecie onłajn ajčynnuju i pierakładnuju litaraturu, a taksama słuchajecie aŭdyjoknihi. Akramia hetaha na sieciŭnaj staroncy elektronnaj biblijateki «Kamunikat» možna aznajomicca z apošnimi navinami. Samaja vialikaja na siońnia elektronnaja biblijateka «Kamunikat» śviatkuje dziesiacihodździe i abiacaje, što biełaruskich knih u volnym dostupie budzie bolš.
— Raniej aknom u Biełaruś za miažoju była tolki Skarynaŭskaja biblijateka ŭ Łondanie, ciapier ža, u XXI st., «Kamunikat» šmat u čym pieraniaŭ jaje estafietu, — kaža historyk biełaruskaha zamiežža Natalla Hardzijenka.
Natalla Hardzijenka ličyć, što najvialikšaja zasłuha «Kamunikatu» — dałučeńnie čytačoŭ, niezaležna ad ich miescaznachodžańnia, da biełaruščyny.
2. ...Cieraź miežy i kardony
Biełaruskaja knižka zrabiłasia mabilnaj i niezaležnaj ad miesca jaje stvareńnia. Naprykład, ciapier, nacisnuŭšy razoŭ kolki pa kłavijatury, možna pasłuchać aŭdyjoknihu Ŭładzimira Arłova ci pahartać usie numary adnoŭlenaj «Našaj Nivy».
Viadoma, revalucyju ŭ ajčynnaj internet-prastory ździejśniŭ nie «Kamunikat», tut łaŭry pieršynstva naležać «Biełaruskaj paličcy» . U kancy 1990-ch vysiłkami entuzijastaŭ u volnym dostupie byli vykładzienyja sotni litaraturnych tvoraŭ: biełaruskich i pierakładnych. Dadamo da hetaha muzyčny partał «Tuzin Hitoŭ», virtualnuju placoŭku z bahatym pieśniazboram, dzie sustrakajucca muzyki, ich słuchačy, a taksama muzyčnyja pradusary.
Ale hadoŭ piać jak nie pracuje «Biełaruskaja palička», a jaje svajačka, «Biełaruskaja elektronnaja biblijateka», taksama nie adnaŭlajecca. U dadatak, na hetych sajtach nie nadta pilnavalisia aŭtarskich pravoŭ: tvory vydavalisia biez dazvołu aŭtaraŭ i pierakładčykaŭ. A jak z aŭtarskimi pravami ŭ «Kamunikatu»?
— Z kožnym tvorcam zaklučajem kantrakt, — kaža kiraŭnik «Kamunikatu», žurnalist Jarasłaŭ Ivaniuk. — Časam aŭtarskija pravy my prosta nabyvajem.
Sajt «Kamunikat» robiać zbolšaha biełastockija biełarusy i biełarusy Padlašša. Kali raniej sajt rabiŭsia na entuzijaźmie, dyk ciapier jaho finansuje polskaja dziaržava.
— Vielmi sumna, što biełaruskaja dziaržava nie padtrymlivaje takija prajekty, — kaža staršynia Rady ZBS «Baćkaŭščyna» Nina Šydłoŭskaja. — Takija prajekty, jak «Kamunikat», dałučajuć da skarbaŭ biełaruskaj litaratury biełarusaŭ, jakija znachodziacca pa-za miežami našaj krainy.