Biełaruś pahadziłasia ŭrehulavać sprečku z Rasijaj pra naftavyja myty na ŭmovach, raniej prapanavanyja rasijskim Minfinam. Pra heta piša hazieta «Kamiersant». Rasijski bok byŭ hatovy admovicca ad mytaŭ na ekspart nafty ŭ Biełaruś u vypadku, kali Minsk budzie apłačvać myty na naftapradukty ŭ poŭnym abjomie.
U rasijskim Minfinie paviedamili, što
Biełaruś zhodnaja pryniać umovy navat kali Rasija rezka pavialičyć ekspartnyja myty na naftapradukty.
Ciapier ekspartnaje myta na rasijskuju naftu składaje $290,6 za tonu, na śvietłyja naftapradukty — $208, a na ciomnyja — $112,2 za tonu. Adnak z 1 śniežnia myta na vyvaz nafty z Rasii moža pavialičycca da $302–304 za tonu, na śvietłyja naftapradukty — da $216–217, a na ciomnyja — da $117 za tonu. Ekspartnaje myta na naftu ŭ Rasii vyšejšaje za myty na naftapradukty, kab stymulavać naftapierapracoŭku.
Hazieta piša, što
pry ciapierašnich staŭkach rasijskich mytaŭ na naftu i naftapradukty Minsk zmoža ekanomić da dvuch miljardaŭ dalaraŭ u hod. Kali Rasija pavialičyć myty, to novaja schiema stracić svaju pryvabnaść dla biełaruskaha boku.
Sprečka pra myty na naftu i naftapradukty Maskva i Minsk viaduć na praciahu niekalkich apošnich hadoŭ, adnak u 2010 hodzie jon abvastryŭsia praz źjaŭleńnie Mytnaha sajuza Rasii, Kazachstana i Biełarusi. U studzieni baki damovilisia, što Biełaruś budzie biazmytna kuplać u Rasii 6,3 miljona ton nafty, a astatnija nieabchodnyja 15,2 miljona ton apłačvać pa mytach naroŭni ź inšymi krainami.
