Nichto z byłych kandydataŭ u prezidenty pakul nie abskardziŭ aficyjnych vynikaŭ vybaraŭ. Pra heta BiełaPAN paviedamiŭ sakratar Centrvybarkama Mikałaj Łazavik.
Pavodle jaho słoŭ, padavać skarhu ab pryznańni vybaraŭ niesapraŭdnymi byłyja kandydaty ŭ prezidenty mohuć nie paźniej čym na treci dzień paśla vybaraŭ, pryčym asabista. Akramia taho, kandydat moža asprečyć rašeńnie Centrvybarkama ŭ Viarchoŭnym sudzie na praciahu dziesiaci dzion.
«Dumaju, skarhi ŭžo naŭrad ci pastupiać», — vykazaŭ mierkavańnie Łazavik.
Pry hetym jon padkreśliŭ: kandydaty, zatrymanyja padčas akcyi apazicyi 19 śniežnia, naŭrad ci mahli b raźličvać na zadavalnieńnie svaich skarhaŭ. «Svaimi pravakacyjami, nakont jakich ich papiaredžvali Centrvybarkam i Hienieralnaja prakuratura, jany pazbavili siabie statusu nie tolki palityka, ale i dobraprystojnaha hramadzianina», — dadaŭ sakratar CVK.
Nahadajem,
eks-kandydaty Uładzimir Niaklajeŭ, Andrej Sańnikaŭ, Vital Rymašeŭski, Mikałaj Statkievič i Aleś Michalevič znachodziacca ŭ śledčym izalatary KDB.
U dačynieńni da arhanizataraŭ niesankcyjanavanaj akcyi raspačata sprava pa artykule 293 Kryminalnaha kodeksa (masavyja biesparadki). Im pahražaje da 15 hadoŭ pazbaŭleńnia voli.