Za pieršy kvartał 2011 hoda Biełaruś straciła dva viadomych niekali brendy, i heta nie adzinaja strata.
Na minułym tydni Nacyjanalny bank pamiž zvodkami z «valutnaha frontu» paviedamiŭ pra vyklučeńnie z Adzinaha dziaržaŭnaha rehistra jurydyčnych asobaŭ i indyvidualnych pradprymalnikaŭ AAT «Džem-Bank» — kaliści adnaho ź vielmi aktyŭnych udzielnikaŭ biełaruskaha bankaŭskaha rynku.
«Džem-bank», jaki vyras z nabytaha ŭ 1995 hodzie HK «Džem» «Servisbanka», skončyŭ svajo isnavańnie skandalna. Nacbank prypyniŭ dziejańnie ŭsich jaho licenzij «u suviazi ź niezdavalniajučym finansavym stanoviščam, jakoje paciahnuła nievykanańnie im svaich abaviazańniaŭ pierad układčykami i inšymi kredytorami», a ŭ 2007 hodzie Vyšejšy haspadarčy sud pryznaŭ «Džem-bank» bankrutam. Niekalki jaho menedžaraŭ atrymali roznyja terminy, adzin z zasnavalnikaŭ abvieščany ŭ mižnarodny vyšuk.
U adroźnieńnie ad «Džem-banka» likvidacyja kampanii «NTT Bieł», jakaja była vyklučanaja z rejestra ŭ pačatku hetaha hoda, — dobraachvotnaje rašeńnie jaje ŭładalnika Paŭła Šumiłava.
De-fakta heta pieršy biełaruski kamputarny brend, jaki źjaviŭsia ŭ Biełarusi z dapamohaj polskaha partniora Tadevuša Kuraka. Ale ŭ 2010 hodzie Šumiłaŭ pryniaŭ rašeńnie syści z hetaha siehmientu, zasiarodziŭšysia na bolš prybytkovych, na jaho dumku,
biznes-napramkach.
U 2010-m z rejestra taksama byli vyklučanyja dva viadomych niekali «atłantaŭskich» pradpryjemstvy-brendy — «Atłant Motars» i «Libierci-aŭto». Abiedźvie kampanii vyklučanyja z rejestra pa vynikach praviedzienaj u 2008–2009 hadach unutranaj restrukturyzacyi chołdynhu «Atłant-M». Zamiest «Atłant Motars» stvoranaja kampanija «Atłant-M Uschod»; aŭtacentr «Atłant-M Libierci», jakim kiravała kampanija «Libierci-M», naohuł zakryty.
Vyklučeńnie z rejestra kampanij «Akvario» i «Estikaru» — vynik prablem ich byłych uładalnikaŭ ź biełaruskim zakanadaŭstvam. Uładalnikam kampanii «Akvario», niekali bujnoha imparciora elitnaj mebli, byŭ biznesoviec Jury Šater. Jon prachodziŭ pa t.zv. «meblevaj spravie», byŭ ekstradyjavany z Hiermanii, kampiensavaŭ škodu i ŭ suviazi z hetym, pavodle dadzienych «Ježiednievnika», padaŭ prašeńnie prezidentu ab pamiłavańni. Były suzasnavalnik druhoj kampanii — «Estikaru», viadomaj pa spravie zvarotnaha PDV z ekspartu lesamateryjałaŭ, Siarhiej Kraŭčanka, ciapier adbyvaje termin.
Jašče adna kančatkova źnikłaja ŭ minułym hodzie viadomaja kampanija pakinuła śled taksama ŭ lasnoj halinie. Havorka idzie pra firmu «Jevronaturparkiet» — adnaho z najbujniejšych u svoj čas vytvorcu elitnaha parkietu z mahutnaściami ŭ Smalavičach. Jana zbankrutavała, i jaje abaviazańni razam z aktyvami ŭziaŭ na siabie «Biełarusbank». Ciapier hetaje pradpryjemstva, praŭda, pad inšym brendam — «Elitparkiet», uvachodzić u skład bankaŭskaha chołdynhu «Biełarusbanka».
Ź inšych viadomych kampanij-brendaŭ u 2010 hodzie kančatkova stali historyjaj dva spartyŭnyja pradpryjemstvy — SP TAA «FK «Tarpieda-MAZ» i ZAT «Stadyjon Traktar», a taksama avijacyjnaje «Intieravia» i miedycynskaje biełaruska-niderłandska-izrailska-lichtenštejnckaje «On Klinik-Minsk». Pajšoŭ z rynku ŭ 2010 hodzie praź likvidacyju svajho pradstaŭnictva hrecki deviełapier «Michaniki Bieł», jaki ničym nie prajaviŭ siabie za try hady.
ej.by
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
