U budučaj brasłaŭskaj rezidencyi budzie piać damoŭ.
Na hetym tydni źjaviłasia infarmacyja, što na bierazie voziera Vołas Paŭnočny pad Brasłavam budujuć jašče adnu rezidencyju dla Alaksandra Łukašenki. Sajt westki.info spasłaŭsia na słova adnaho z budaŭnikoŭ. Toj zajaviŭ, što «kab zrabić prystań, byli zaviezieny tysiačy ton piasku».
Rezidencyja budzie atočanaja piaćciu kiłamietrami aharodžy ź biarvieńnia, kožny pralot jakoj kaštuje 1,2 młn rubloŭ. Tam buduć pastajanna pracavać šeśćdziasiat čałaviek absłuhoŭvajučaha piersanału».
Pa jaho słovach, zdača abjekta zapłanavana na maj.
U pres-słužbie Administracyi prezidenta nie stali kamientavać takuju infarmacyju. Spasłalisia na adsutnaść načalnika Paŭła Lohkaha, jaki znachodzicca ŭ kamandziroŭcy. Maŭjaŭ, tolki jon moža paćvierdzić albo asprečyć niešta.
Zatoje ŭ Brasłaŭskim rajvykankamie paviedamili, što budaŭnictva viadzie Hałoŭnaje ŭpraŭleńnie kapitalnaha budaŭnictva Kiraŭnictva spravaŭ prezidenta. Rajonny čynoŭnik, praŭda, nie zmoh udakładnić, što heta za abjekt uzvodzicca.
Načalnik upraŭleńnia Uładzimir Hakanaŭ paviedamiŭ pra budaŭnictva turystyčnaha kompleksu. Ź piaci damkoŭ.
Budujuć, kab možna było i «zarablać valutu, jakoj nidzie niama».
Upeŭnieny jon, što tam i «vysokija delehacyi» možna budzie pryniać.Pa słovach Hakanava, kompleks moža być zavieršany da kanca hoda. Ale dakładnych terminaŭ jon nie nazvaŭ. A što da «čutak», dyk čynoŭnik prapanavaŭ lubomu achvočamu pryjechać na miesca i pahladzieć na abjekt. Maŭlaŭ, budoŭla adkrytaja dla naviedvańnia.
Budaŭnictva na bierazie voziera viadziecca ź leta minułaha hoda. Adzin z žycharoŭ Brasłava paviedamiŭ, što nieaficyjna havorać pra rezidencyju Alaksandra Łukašenki. I nibyta chutka budzie pierakryty padjezd da voziera.
U Nacyjanalnym parku «Brasłaŭskija aziory», u jaki ŭvachodzić i voziera Vołas Paŭnočny, nie stali tłumačyć, što za budoŭla idzie na bierazie voziera.
Paraili źviartacca ŭ Administracyju prezidenta. Maŭlaŭ, budaŭnictva — dziaržaŭnaja tajamnica. I jašče papiaredzili być «aściarožnym z pytańniami, jakija vy zadajacie».
Sam Nacpark padparadkavany Kiraŭnictvu spravaŭ prezidenta. Adnoj z asnoŭnych zadač apošniaj struktury — zabieśpiačeńnie zachavańnia ŭnikalnych zapaviednych miescaŭ Biełarusi, jakija majuć nacyjanalnaje i mižnarodnaje značeńnie.
Jašče niekalki hadoŭ tamu pobač z vozieram Vołas Paŭnočny zabaranialisia źmianieńnie naturalnaha stanu, ruch transpartu, vypas žyvioły. Voziera Vołas Paŭnočny ŭvachodziła ŭ Mižaziorny łandšaftny zakaźnik. Pa biełaruskim zakanadaŭstvie, prezident maje prava sam prymać rašeńnie pra ŭviadzieńnie ci vyviadzieńnie peŭnaj terytoryi ź miežaŭ zakaźnika. U 2008 hodzie status zakaźnika ŭvohule źniali. A ŭviali «asablivyja zony», u jakija voziera ŭžo nie trapiła.
* * *
Vołas Paŭnočny — voziera, jakoje znachodzicca za 6,5 km na paŭnočny ŭschod ad horada Brasłaŭ la vioski Lavoški. Naležyć da hrupy Brasłaŭskich azior, uvachodziła ŭ Mižaziorny łandšaftny zakaźnik. Voziera amal całkam atačaje les.
