Niekalki tydniaŭ tamu Ministerstva achovy zdaroŭja piśmova nahadała aptekam pra adkaznaść za prodaž lekaŭ biez recepta i pra toje, što isnuje abmiežavany śpis preparataŭ, recept na jakija nie patrabujecca.Adnak nieŭzabavie paśla heta źjaviłasia infarmacyja, što štrafavać «parušalnikaŭ» usio ž taki nie buduć.
Tym nie mienš, jak paviedamili ŭ adnoj minskaj aptecy, «infarmacyja pra toje, što nas byccam by nie buduć karać, jość. Ale heta nie piśmo Minachovy zdaroŭja, to bok nie aficyjny dakumient, na jaki možna spasyłacca».
Vyjšła, što leki, jakija ludzi zvyklisia nabyvać biez receptu (naprykład, antybijotyki i šerah preparataŭ ad serca j cisku) zaraz možna nabyć, tolki naviedaŭšy doktara.
Heta pryviało da rezkaha skaračeńnia prodažu lekavych preparataŭ i čerhaŭ u paliklinikach. Jak paviedamili ŭ adnoj minskaj aptecy,
«na siońniašni dzień možna kazać pra zakryćcio apteki».
Z hetaj dumkaj pahadžajucca inšyja farmaceŭty. «Kali prytrymlivacca ŭkazańniaŭ Ministerstva achovy zdaroŭja, to heta sapraŭdy tak. Naturalna, prodažy ŭpali. Tut isnuje naŭprostavaja zaležnaść. Starajemsia prytrymlivacca śpisa biezrecepturnych preparataŭ. Ale pakolki da 2012 hoda nas paabiacali nie karać, to i da klijentaŭ stavimsia pabłažliva, chacia dakładnaha dakumienta niama, usio na ŭzroŭni čutak. Naprykład, hipiertonikam my prosta z etyčnych pierakanańniaŭ nie majem prava admović — prychodziać čyrvonyja, u ich pieradkryzavy stan».
Tym časam čutki supiarečlivyja: adny kažuć, što možna adpuskać usio, akramia antybijotykaŭ i narkatyčnych rečyvaŭ. Inšyja ž stroha pryprymlivajucca śpisa biezrecepturnych preparataŭ.
Na dumku farmaceŭta pryvatnaj minskaj apteki,
źnižeńnie prodažu «ŭdaryć» u pieršuju čarhu pa dziaržaŭnych aptekach, bo ŭ ich značna vuziejšy asartymient.
Razam z tym, jak paviedamiŭ hienieralny dyrektar RUPP «Biełmiedpreparaty» Viktar Zaleski: «Sprava ŭ tym, što patrabavańnie pradavać leki pa receptach nichto nikoli nie admianiaŭ. Prosta letam Ministrestva surjozna za heta «ŭziałosia», što vyklikała chvalu pytańniaŭ.
Nidzie ŭ śviecie vy nie nabudziecie ŭ aptecy niešta bolš surjoznaje za BAD.Kali niejki miedycynski preparat moža akazać pabočny, škodny efiekt, to bok užyvańnie jaho biez naznačeńnia doktara niasie pahrozu zdaroŭju, to vypisvać recept — heta łahična. Samalačeńniem časam možna tolki pakalečyć siabie. Tamu i byŭ stvorany śpis biezrecepturnych preparataŭ."
A toje, što ŭ balnicach nie chapaje daktaroŭ, kab vypisvać recepty usim achvotnym, užo inšaja prablema. Mahčyma, tamu i źjaviłasia infarmacyja, što da siaredziny minułaha hoda apteki nie buduć «čapać».
Vychodzić, što vyrašeńnie adnoj prablemy — prodaž lekaŭ biez receptu, pryviało da ŭźniknieńnia inšych —
pavieličeńnia čerhaŭ u miedycynskich ustanovach, niezadavolenaści ludziej.
Tym časam farmaceŭty padličvajuć straty ŭ čakańni aficyjnaha piśma ad Ministerstva achovy zdaroŭja.
