Dačakaŭšysia 9 listapada, karespandent «NN» vypraviŭsia ŭ abmieńnik. Data dla biełaruskaj ekanomiki istotnaja, bo mienavita z hetaha dnia dla kupli luboj valuty patrabujecca pašpart. Što ž, pravierym novaŭviadzieńni na sabie.
Adździaleńnie «Biełarusbanka» kala płoščy Pieramohi. Z valutaj pracujuć usie vokny, ale achvotnych nabyć dalary i jeŭra niama. Dačakaŭšysia svajoj čarhi, prašu $10 i zapuskaju siekundamier. Raniej abmianiać hrošy možna było za siekund tryccać, što ž budzie ciapier?
«Pašpart z saboj jość?» — pytajecca kasirka. «Viadoma ž!», — praciahvaju jaho joj. Mužčyna zboku pytajecca,
a kolki ciapier u dzień možna kuplać valuty?«Biez abmiežavańniaŭ!» — z honaram adkazvaje kasirka i zapuskaje prahramu, u jakuju daviadziecca ŭvieści ŭsiu infarmacyju z majho pašparta. Zdajecca, jana bačyć prahramu ŭpieršyniu, bo ŭdakładniaje ŭ kalehi: «Što, i miesca naradžeńnia ŭkazvać?» Taja kateharyčnaja: «Zapaŭniaj usie hrafy». U kampjutar pavolna pieraciakajuć proźvišča, imia, imia pa baćku, miesca rehistracyi… Siekundy cikajuć i cikajuć, a dalary ja atrymać tak i nie mahu. Raptam kasirka zachodzicca śmiecham: «A metu kupli jakuju ŭkazvać?» Ja zadumvajusia, sapraŭdy,
navošta mnie taja valuta?Susiedka padkazvaje: «Pišy, što dla asabistych patrebaŭ». Narešcie, ankietavańnie skančvajecca, i kasirka vydaje mnie hrošy i ček. Darečy, na im nijakaj asabistaj infarmacyi niama, tolki suma valuty i kurs, jak i raniej. Hladžu na siekundamier — prajšło try z pałovaj chviliny.
«Mety kupli treba było ŭkazvać i raniej, ale tolki pry vialikich abjomach valuty, —tłumačyć supracoŭnik inšaha adździaleńnia «Biełarusbanka». — Adzin klijent skazaŭ, što nie daviaraje bankaŭskaj sistemie Biełarusi, dyk ja heta i zapisaŭ u bazu. A ciapier situacyju daviali da absurdu. Navat kali ŭ mianie kuplajuć adzin dalar, ja budu pieradrukoŭvać infarmacyju z pašparta, a paśla jašče śmiašyć čarhu svaim niedarečnym pytańniem «Navošta valuta?».
0
0
0
0
0
0
