Ź inicyjatarkaj akcyi pratestu pradprymalnikaŭ handlovaha centra «Prestan», što ŭ Mahilovie, Ludmiłaj Kryłovič nie praciahnuli damovu na arendu handlovaj płoščy. Akramia taho, joj zacikaviŭsia KDB. U administracyi «Prestana» zajaŭlajuć, što pradprymalnica nie vykonvała abaviazkaŭ pavodle staroj damovy.
Akcyja pratestu pradprymalnikaŭ, jakija arandujuć handlovyja płoščy ŭ «Prestanie», adbyłasia sioleta 27 žniŭnia.Biźniesoŭcy vystupali suprać zakryćcia handlovaha centra i skasavańnia damovaŭ. Pavodle pradprymalnikaŭ, zakryć centr mielisia da 1 kastryčnika. Pratest vyklikaŭ šyroki rozhałas u horadzie. Padklučyłasia miascovaja ŭłada, jakaja harantavała, što z «Prestanam» budzie ŭsio ŭ paradku. Žarści pamału zacichli. I voś 30 listapada adnoj ź inicyjatarak pratestu Ludmile Kryłovič paviedamili, što damova ź joj pierazaklučanaja nie budzie.
«Ja zajšła da buchhałtara i skazała, što mnie voś takaja cikavaja papiera pryjšła. Tam adkazali — my viedajem: «Vy nam nie płacicie hrošy, jak usie, tamu vy nam nie patrebnyja». Ja pajšła da dyrektara. Jon skazaŭ, što «tak, z vami damovy my zaklučać nie budziem». Ja jamu: «A čamu pryčyny nie paznačyli?» A jon mnie: «A dzie heta napisana, što ja mušu paznačać pryčynu?» — apaviadaje Ludmiła Kryłovič.
U administracyi handlovaha centra paćvierdzili, što adnosinaŭ z pradprymalnicaj Kryłovič praciahvać nie buduć. Pavodle pradstaŭnika administracyi, tak vyrašyŭ uładalnik centra «Strynhahraservis»: «Parušeńni ŭ jaje jość, pryčym vialikija.
A toje, što jana paŭsiul biehaje i ludziej ahituje za toje, kab jany bastavać stali, — hetym niachaj zajmajucca kampietentnyja orhany.Ja nie źbirajusia ź joj raźbiracca».
Kampietentnyja orhany nie stali doŭha čakać. Praź niekalki hadzin paśla hutarki z dyrektaram Ludmile Kryłovič patelefanavaŭ supracoŭnik KDB. Paprasiŭ, kab taja pryjšła na hutarku. Jana admoviłasia, adkazała, kab jon sam pryjšoŭ.
«Jon proźvišča nie nazvaŭ svajo. Skazaŭ, što
pastupiła infarmacyja, što ja rychtuju zabastoŭku.Ciapier u handlovym centry ŭsie ŭ šoku, jak myšy chavajucca — nie vyklučajuć, što i na ich infarmacyja ŭ KDB visić. Ciapier usie zapałochanyja. Na heta, vidać, staŭka i była zroblena — praz adnaho čałavieka zapałochać usich astatnich», — miarkuje Ludmiła Kryłovič.
Pradprymalnica na administracyju handlovaha centra padała skarhi ŭ harvykankam i abłvykankam. Prosić čynoŭnikaŭ abaranić jaje ad cisku i pahrozaŭ.
Źviarnułasia jana i da hramadskich pravaabaroncaŭ. Adzin ź ich, Barys Buchiel, zajaŭlaje, što zaruka biaśpieki biźniesoŭki ciapier — kab situacyja, što skłałasia vakoł jaje, atrymała šyroki rezanans: «Vypadak z Kryłovič jaskrava vyjaviŭ poŭnuju pravavuju nieabaronienaść pradprymalnikaŭ pierad arandadaŭcami. Luby pratest biźniesoŭcaŭ viadzie da niehatyŭnych nastupstvaŭ dla ich. Na žal,
treba adznačyć vielmi nizkuju zdolnaść ipešnikaŭ da salidarnych dziejańniaŭ.Pradprymalnica źviarnułasia da nas, budziem joj dapamahać. Spadziajusia, što jana zmoža nadalej zajmajecca svajoj spravaj».
