Ukaz № 7 ad 5 studzienia «Ab niekatorych pytańniach pieraŭtvareńnia respublikanskich unitarnych pradpryjemstvaŭ u adkrytyja akcyjaniernyja tavarystvy» supiarečyć zakanadaŭstvu i nacyjanalnym intaresam Biełarusi, havorycca ŭ zajavie sojma Partyi BNF,pryniataj na pasiadžeńni 28 studzienia ŭ Minsku.
Nahadajem, ukazam vyznačany pieralik z 54 respublikanskich unitarnych pradpryjemstvaŭ, pry pieraŭtvareńni jakich u adkrytyja akcyjaniernyja tavarystvy ŭ 2011—2013 hady akcyi, što naležać Respublicy Biełaruś, nie padlahajuć prodažu na lhotnych umovach za hrašovyja srodki.
U zajavie adznačajecca, što, takim čynam, rabočyja hetych pradpryjemstvaŭ «faktyčna pazbaŭlajucca prava na ŭdzieł u akcyjanavańni svaich zavodaŭ i pramysłovych abjadnańniaŭ».
Sojm ličyć, što padpisańniem ukaza
«zrobleny čarhovy krok na šlachu jurydyčnaj padrychtoŭki da zdačy ekanamičnaha suvierenitetu krainy praź nieprazrystuju i niespraviadlivuju pryvatyzacyju, jakaja rychtujecca na karyść zamiežnaha, jak śviedčyć praktyka — u asnoŭnym aliharchičnaha rasijskaha, kapitału i biez udziełu nacyjanalnaha kapitału».
Viadomaja hramadstvu infarmacyja, jakaja tyčycca prodažu «Biełtranshazu», na dumku sojma, śviedčyć, što
«tajnaja i nieprazrystaja pryvatyzacyja nie tolki nie vyrašaje biahučych ekanamičnych prablem Biełarusi, ale i stavić krainu ŭ stanovišča paŭkałanijalnaj terytoryi z abmiežavanym dziaržaŭnym suvierenitetam».
Pry hetym u zajavie adznačajecca, što
padpisańnie ŭkaza było b apraŭdana «va ŭmovach praviadzieńnia kompleksnych reform u kirunku libieralizacyi pry strohim viaršenstvie zakona i prazrystaści pryvatyzacyjnych damoŭlenaściej»i pryviało da pryciahnieńnia inviestycyj, u tym liku dla zabieśpiačeńnia ekanamičnaha rostu ŭ krainie.
«Ale ŭ siońniašniaj situacyi poŭnaha daminavańnia rasijskaha aliharchičnaha kapitału ŭ pytańniach dostupu da pryvatyzacyi najbolš efiektyŭnych biełaruskich pradpryjemstvaŭ taki krok tolki spraščaje dla rasijskich aliharchaŭ atrymańnie kantrolu nad biełaruskimi zavodami, što padryvaje ekanamičny suvierenitet krainy», — havorycca ŭ zajavie.
