Ekspart biełaruskaha miasa ŭ Rasieju pad pytańniem. Z metaju abarony ajčynnych vytvocaŭ rychtujucca zachady pa abmiežavańni impartu polskaha miasa.
Biełaruskija vytvorcy miasa‑małočnaj pradukcyi ź nieciarpieńniem čakajuć inspekcyju Raśsielhasnahladu. 15 studzienia Ministerstva sielskaj haspadarki i charču Biełarusi i rasiejskaja Federalnaja słužba pa veterynarnym i fitasanitarnym nahladzie pryniali rašeńnie ab tym, što ad 1 sakavika na biełaruskich pastaŭnikoŭ charčovaj pradukcyi budzie raspaŭsiudžvacca atestacyja Raśsielhasnahladu. To bok, biez atrymańnia hetaj atestacyi ekspart biełaruskaj pradukcyi ŭ Rasieju stanie niemahčymy. Na mienskich miasakambinatach rasiejskich inspektaraŭ čakali jašče 10 lutaha, adnak jany nie źjavilisia dahetul, piša hazeta «Biełorusy i rynok».
Hazeta pryvodzić niekalki krasamoŭnych faktaŭ, jakija śviedčać na karyść taho, što biełaruskaja charčovaja pramysłovaść stała zakładnicaj biełaruska‑rasiejskich enerhietyčnych nieparazumieńniaŭ. Tak, u Rasiei skłałasia niespryjalnaja sytuacyja ŭ ahrasektary i popyt na impartnaje miasa raście ŭ siarednim na 12% štohod, u toj ža čas u Biełarusi nazirajecca peŭny rost u hetaj sfery. Spałučeńnie hetych faktaraŭ pryviało da taho, što amal 90% ekspartu charčovaj pradukcyi, ź istotnaj dolaj u joj miasnoj pradukcyi, u minułym hodzie prypała na jomisty i dynamičny rasiejski rynak. U śviatle napružanych adnosinaŭ z Rasiejaj vokaimhnienna znajści alternatyvu takomu rynku budzie vielmi prablematyčna.
Tym časam na źnižeńnie abjomaŭ ekspartu biełaruskaha miasa ŭ Rasieju paŭpłyvała taksama roźnica ŭ koštach: u Rasiei adbyvajecca sezonnaje panižeńnie koštu, u toj ža čas u Biełarusi padvysilisia zakupačnyja košty na jałavičynu i śvininu, što robić ekspart biełaruskaha miasa ŭ Rasieju nieprybytkovym, a to j stratnym.
Rasiejskija aficyjnyja asoby, tym nie mienš, zaviarajuć, što nijakich pieraškodaŭ dla biełaruskich eksparcioraŭ, atestavanych Raśsielhasnahladam, čynicca nia budzie, jak i nia budzie zatrymak z samoj praceduraj atestacyi. Adnak biełaruski bok vidavočna rychtujecca da roznych varyjantaŭ raźvićcia sytuacyi i ad pačatku hodu pradprymaje zachady pa abaronie ajčynnych vytvorcaŭ miasnoj pradukcyi. Tak, sa studzienia časova prypynienyja pastaŭki miasa z Polščy. Pavodle nieaficyjnaj infarmacyi kamercyjnyja arhanizacyi, što zajmajucca impartam polskaha miasa, čakajuć na adpaviednuju instrukcyju z uradu. Nibyta pytańnie ŭvozu syroha miasa z Polščy ŭžo vyrašanaje, zastajecca pytańnie hatovaj miasnoj pradukcyi, jakuju, mahčyma, dazvolać zamozić u abmiežavanaj kolkaści.
U ilustracyi vykarystany ekspanat kalekcyi marazmu Arciemija Lebiedzieva
