Budaŭnictva pieršaj u Biełarusi haścinicy dla žyvioł prypyniena 4

Jak paviedamiła namieśnik dyrektara staličnaha pradpryjemstva pa časovym utrymańni žyvioł «Faŭna horada» Tamara Carykoŭskaja, budaŭnictva, jakoje pačałosia ŭ lipieni 2010 hoda na vulicy Hurskaha, zamarozili ŭ lutym hetaha hoda z-za niedachopu srodkaŭ.

Budaŭnictva ažyćciaŭlała HA «Minskaja žyllova-kamunalnaja haspadarka» za košt padatkaŭ, jakimi abkładajucca ŭładalniki sabak. Pavodle rašeńnia Minharsavieta, na budaŭnictva haścinicy pavinna nakiroŭvacca čverć zboru padatkaŭ z uładalnikaŭ sabak, astatnija srodki iduć na ŭtrymańnie «Faŭny horada». (Da pačatku budaŭnictva haścinicy častka padatkovych zboraŭ z uładalnikaŭ sabak išła na budaŭnictva placovak dla ich vyhułu.)

Pavodle słoŭ Carykoŭskaj, padatki płaciać usiaho prykładna 12 tysiač uładalnikaŭ sabak, u toj čas jak, pavodle acenki «Faŭny horada», ich naličvajecca bolš za 100 tysiač.

Suma padatkovaha zboru ŭ Minsku składaje ad 0,4 da 1,5 bazavaj vieličyni — ad 14 tys. da 52 tys. 200 rubloŭ. Čakajecca, što navat paśla pavyšeńnia bazavaj vieličyni z 1 krasavika padatkovy zbor vyraście niaznačna: pavodle nieaficyjnaj infarmacyi, Minharsaviet rychtuje rašeńnie, u adpaviednaści ź jakim suma padatkovaha zboru z uładalnikaŭ sabak z 1 krasavika budzie pamnažacca na 0,5.

Pradstaŭnik «Faŭny horada» nie zmahła skazać, kali adnovicca budaŭnictva haścinicy. Jana adznačyła, što jaje ŭźviadzieńnie płanavałasia pačać jašče ŭ kancy 2007 hoda, ale realizacyja prajekta nieadnarazova adkładvałasia ŭ suviazi ź nieabchodnaściu ŭzhadnieńnia niekatorych pytańniaŭ. U pryvatnaści, suprać budaŭnictva vystupali niekatoryja žychary mikrarajona, jakija vystupali praciŭnikami sabačaha brechu pa načach.

Jak paviedamlałasia raniej, haścinica pavinna być pabudavana ŭ vyhladzie adnapaviarchovaha pamiaškańnia, unutry jakoha raźmieściacca valjery: prykładna 50 miescaŭ dla sabak i 30 — dla katoŭ. U budynku taksama buduć znachodzicca admyvalnia, cyrulnia, majsternia pa pašyvie adzieńnia dla žyvioł. Pry haścinicy płanujecca adkryć mahazin aksiesuaraŭ i kormu dla žyvioł.

U svaju čarhu staršynia hramadskaha abjadnańnia abarony žyvioł «Ehida» Natalla Bialanava razumieje abureńnie ludziej, jakija nie žadajuć płacić padatki na sabak, bo za ich ža srodki rabotnikii «Faŭny horada» mohuć adłavić i ŭsypić hadavanca, jaki vypadkova zhubiŭsia. Pavodle jaje słoŭ, apošnim časam u horadzie adznačany vypadki źniščeńnia sabak, jakija apynulisia na vulicy biez haspadara, pradstaŭnikami «Fauny horada».

Što da budaŭnictva haścinicy, to Bialanava nazvała heta «poŭnaściu kamiercyjnym mierapryjemstvam». «Nichto nie zapytvaŭ uładalnikaŭ sabak, ci chočuć jany haścinicu abo prytułak dla biazdomnych žyvioł», — adznačyła kiraŭnik abjadnańnia.

Varta adznačyć, što šmat hadoŭ HA «Ehida» nie moža atrymać dazvoł haradskich uład na budaŭnictva prytułku dla biazdomnych žyvioł.

Anastasija Janušeŭskaja, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH