U Nacyjanalnaha banka jość zaściarohi adnosna mahčymaści čarhovaha vitka inflacyi ŭ suviazi z płanavanym z 1 žniŭnia i ŭ kastryčniku pavieličeńniem taryfnaj staŭki. Pra heta žurnalistam zajaviła staršynia praŭleńnia Nacbanka Nadzieja Jermakova.
«Viadoma, jość zaściarohi. Čym bolš źjaŭlajecca hrošaj u abaračeńni i kali hetyja hrošy niama kudy budzie ŭkłaści, nie buduć prapanavanyja tavary, pasłuhi, najpierš ajčynnaj vytvorčaści, to hetyja hrošy mohuć stvaryć umovy dla inflacyi i dadatkovy popyt na valutu», — kanstatavała Jermakova.
Tamu, pavodle jaje słoŭ, «naša zadača — vytvorcaŭ i kiraŭnikoŭ, Nacyjanalnaha banka — usimi sposabami, formami i mietadami znajści, jak hetyja hrošy zabrać». «Dla hetaha pavinna być vysokaja staŭka pa ŭkładach nasielnictva i tady źnižeńnie staŭki refinansavańnia ŭžo nie ŭkładvajecca ŭ hetyja płany. Staŭka refinansavańnia heta jak indykatar cany hrošaj i pa ŭkładach, i pa kredytach», — zaznačyła staršynia praŭleńnia Nacbanka.
Ale samaje hałoŭnaje, jak zajaviła Jermakova, kab hetyja hrošy nie prosta byli ŭkładzienyja va ŭkłady, a kab jany byli ŭkładzienyja ŭ tavary i pasłuhi, jakija vyrabić ajčynnaja ekanomika.
«U Nacyjanalnaha banka mietad strymlivańnia inflacyi — heta vysokija pracentnyja staŭki, dla taho kab nie raźvivałasia jašče dadatkovaje kredytavańnie», — skazała Nadzieja Jermakova.
