19 listapada ŭ Minsku adkryjecca fiestyval JazzinMinsk 1

Pieršy mižnarodny fiestyval JazzinMinsk-2012 projdzie ŭ biełaruskaj stalicy z 19 pa 22 listapada.

Jon arhanizavany pradziusarskim centram «JazzinMinsk & Džaz-kłub Jaŭhiena Uładzimirava» pry sadziejničańni Ministerstva kultury Respubliki Biełaruś i Nacyjanalnaj kamisii JUNIESKA. Hienieralnym partnioram vystupaje Respublikanskaja kanfiederacyja pradprymalnictva.

U fiestyvali voźmuć udzieł viadomyja džazavyja muzykanty z ZŠA, Brazilii, Izraila, Anhlii, Hiermanii, Polščy, Italii, Rasii i Biełarusi.

Kancerty buduć prachodzić na dźviuch scenach — u Pałacy prafsajuzaŭ i ŭ Džaz-kłubie Jaŭhiena Uładzimirava, jaki raźmieščany ŭ Pałacy Respubliki. Majstar-kłasy zamiežnych vykanaŭcaŭ buduć arhanizavany ŭ Akademii muzyki i va Univiersitecie mastactvaŭ.

Arhanizatary fiestyvalu abiacajuć minčanam i haściam horada «cudoŭnaje śviata najvyšejšaj jakaści muzyki, enierhii i radaści žyćcia». Akramia čatyroch asnoŭnych fiestyvalnych dzion, padčas kožnaha ź jakich buduć prachodzić pa dva kancerty, u miežach JazzinMinsk-2012 zapłanavany šerah «cikavych džazavych mierapryjemstvaŭ», pra padrabiaznaści jakich možna daviedacca na sajcie www.jazzclub.by.

Košt biletaŭ na kožny ź fiestyvalnych dzion vahajecca ad 50 da 450 tysiač rubloŭ.

Pry kupli abaniemienta na ŭsie čatyry dni praduhledžana 20-pracentnaja skidka, na try dni — skidka ŭ 15%.

Pavodle słoŭ dyrektara džaz-kłuba Jaŭhiena Uładzimirava, fiestyval JazzinMinsk-2012 «abjadnaŭ pad svaimi ściahami cełuju armiju virtuozaŭ z roznych krain śvietu». «Heta nie tolki muzyka najvyšejšaj proby, znajomstva z metrami suśvietnaha džaza i ich novymi rabotami, ale i adkryćci», — skazaŭ jon.

«Džaz dla muzyki — heta katalizatar raźvićcia. Dastatkova krychu pahłybicca ŭ historyju i ŭspomnić, skažam, skrypičnyja kancerty Pahanini, arhannyja preludyi i fuhi Bacha — heta ž sapraŭdnaja impravizacyja.

Džaz isnuje nie dla biednych i nie dla bahatych. Jaho aŭdytoryju treba razhladać u inšaj płoskaści — heta pačućciovyja i ramantyčnyja ludzi, heta ludzi, nie toje kab padrychtavanyja ŭ płanie muzyčnaj adukacyi, a jakija prosta pa svajoj pryrodzie majuć bahaty ŭnutrany śviet, pazityŭnuju enierhiju stvareńnia. Mienavita jany robiać śviet lepšym. Čym bolš raźvitaje hramadstva — tym bolš džaza», — śćviardžaje dyrektar džaz-kłuba.

Uładzimiraŭ źviarnuŭ uvahu na toje, što ŭ 2012 hodzie JUNIESKA abviaściła džaz «najvyšejšym mastactvam sučasnaha śvietu, jakoje abjadnoŭvaje krainy i narody».

«Za 17 hadoŭ dziejnaści džaz-kłuba my paznajomili biełaruskuju publiku ź vielizarnaj kolkaściu vydatnych vykanaŭcaŭ. Naša zadača — papularyzavać talenavitych biełaruskich muzykantaŭ. Dla ich praca na adnoj scenie ź vialikimi vykanaŭcami džazavaj muzyki daje vielmi šmat», — adznačyŭ dyrektar džaz-kłuba, uznaharodžany dypłomam JUNIESKA za značny ŭniosak u raźvićcio džazavaj muzyki ŭ Biełarusi.

Pry hetym Uładzimiraŭ zaŭvažyŭ, što džaz nie samaakupny. «Niemahčyma heta rabić bieź finansavaj padtrymki. Naprykład, dziejnaść śviatočnaha ahienctva Jaŭhiena Uładzimirava, stvoranaha na bazie džaz-kłuba, pakryvaje finansavyja straty samoha džaz-kłuba», — havoryć dyrektar.

Zrešty, pavodle jaho słoŭ, hrošaj publiki «nikoli nie chapaje na vysokaje mastactva — heta možna rabić tolki za košt padtrymki miecenataŭ i sponsaraŭ».

«Kali vy pahladzicie na historyju Džaz-kłuba Jaŭhiena Uładzimirava, našy sponsary — heta tolki amatary džaza, jany sapraŭdy chočuć dapamahčy. Dla ich heta nie pytańnie rekłamy handlovaj marki, a pytańnie emacyjanalnaj addačy. Heta ich uniosak u muzyku», — padkreśliŭ Uładzimiraŭ.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH