Adrozna ad štohadovaha pasłańnia, zroblenaha najpierš pa zakonach pijaru, siońniašniaja ekanamičnaja narada ŭ Łukašenki abmalavała stan ekanomiki biez prycharošvańnia. Upieršyniu na samym vysokim uzroŭni kanstatujucca surjoznyja prablemy.
U pryvatnaści, nia vykanana až vosiem prahnoznych pakazčykaŭ. Takoha zamachu na sakralnyja ličby, zdajecca, jašče nie było. Ale radykalnych prapanoŭ, jak złamać nehatyŭny trend, nie prahučała. Dyj ci varta ad tych niebarak-ministraŭ čakać idejnaha fantanavańnia? Łukašenka adrazu papiaredziŭ, što "hetyja liberalnyja zamaški, jak u Rasiei, nam nieprydatnyja". Nadzieja, jak i raniej, na administracyjnyja vahary.
Niaŭžo naviersie nia bačać, što heta ŭžo nie spracoŭvaje? Bačać, miarkuje ekanamist Leanid Zaika, ź jakim ja tolki što hutaryŭ. Inšaja reč, što, na dumku eksperta, prezydent i atačeńnie dasiul nia vierać svaim vačam. Kažučy navukova, maje miesca "źjava kahnityŭnaha dysanansu", zaznačyŭ moj surazmoŭca. Načalstvu ciažka asensavać toj prykry fakt, što ekanamičnaja madel, jakaja zdavałasia viaršyniaj daskanałaści i niejki čas sapraŭdy davała ŭražalnyja vyniki (inšaje pytańnie, za košt čaho), zaraz užo nia jość panacejaj.
Pra siońniašni stan ajčynnaj ekanomiki ekspert vykazaŭsia tak: "Hetaja spadarynia jašče nie schudnieła, ale ŭžo kašlaje i adčuvaje, jak uźnimajecca temperatura". Jon prahnazuje finansavyja prablemy ŭžo ŭ lipieni — žniŭni, kali daviadziecca całkam raźličvacca za rasiejski haz dy vypłočvać adpusknyja nastaŭnikam.
Leanid Zaika paŭtaryŭ svaju ŭlubionuju metafaru apošniaha času: Maskva viadzie pieradprodažnuju padrychtoŭku Biełarusi. To bok imkniecca pastavić jaje na kaleni ŭ ekanamičnym sensie, kab zmusić achviaravać jak minimum "familnym srebram". Pra maksymum — zdahadvajeciesia...
Vyjściem moža być tolki novy ekanamičny kurs. Ale na siońniašniaj naradzie aficyjny kiraŭnik znoŭ daŭ zrazumieć, što na "nep" pajści nie hatovy. Jon achaładziŭ impet umoŭna-refarmatarskaha kryła Saŭminu: "Va ŭradzie pačali hučać hałasy nakont nieabchodnaści karektavańnia i navat źmieny ekanamičnaha kursu, budziem ličyć heta pryvatnym mierkavańniem. Padychodzić da hetaha pytańnia nieabchodna ŭzvažana, pradumana, jak i abiacali narodu".
Karaciej, pakul što ŭ ekanamičnaj sfery vymaloŭvajecca samaja niepraduktyŭnaja perspektyva, kali chvost buduć adsiakać za niekalki razoŭ.
