U Polščy u aŭtorak adbyŭsia adnadzionny papiaradžalny strajk lekaraŭ. U akcyi pryniali ŭdzieł supracoŭniki bolš za 250 špitaloŭ va ŭsioj krainie. Strajk palahaŭ na tym, što adtreminavana aperacyi, nie pracavali palikliniki, a medycynskuju dapamohu akazvali tolki ŭ sytuacyi pahrozy dla žyćcia. Tam, dzie nia byŭ abvieščany strajk, lekary pajšli ŭ vodpusk pa ŭłasnym žadańni.
Pratestujučyja damahajucca pavialičeńnia zarobkaŭ, ale jany padkreślivajuć, što sprava nia tolki ŭ zarpłatach, a pierad usim u refarmavańni słužby achovy zdaroŭja u Polščy.
U akcyi nie pryniali ŭdziełu: chutkaja dapamoha, stancyi dyjalizaŭ, ankalahičnyja adździaleńni, adździaleńni intensiŭnaj medycynskaj apieki j radzilnyja adździaleńni.
Kali da 21 traŭnia sa strajkujučymi nie sustrenucca premjer‑ministar i ministar finansaŭ, lekary zajaŭlajuć, što pačniecca praciahły strajk.
Medyki ŭ Polščy zmahajucca nia tolki za hodnyja zarobki, ale taksama za vypraŭleńnie stereatypu lekara‑chabarnika. Tamu lekary raspačali akcyju «Ja nie biaru chabaru. Chaču narmalna zarablać». Heta taksama metad baraćby z karupcyjaj. Pra akcyju aficyjna zajavili ŭ paniadziełak u Varšavie. Toj, chto padtrymlivaje ideju, pryšpilvaje da chałata kruhły značok ź biełaj ładoniaj na čyrvonym fonie j z nadpisam «Ja nie biaru chabaru. Chaču narmalna zarablać».
Padčas pres‑kanferencyi inicyjatar prajektu Pavał Jezierski ź Instytutu psychijatryi j neŭralohii źniščyŭ vialiki kanvert — symbal hetak zvanaj «udziačnaści pacyjentaŭ».
P. Jezierski: Hety symbal pavinien źniknuć sa stereatypu lekara. Tamu ja ŭračysta razryvaju hety kanvert.
Pavał Jezierski kaža, što akcyja pierš za ŭsio pavinna źviarnuć uvahu hramadztva na skandalna nizkija zarobki maładych lekaraŭ.
P. Jezierski: My adkryta chočam skazać, što nie žadajem być horšymi za prybiralščycu ŭ špitali. Ja, naprykład, u špitali zarablaju mienš, čym prybiralščyca. Kali niechta nosić pryšpileny taki značok, to heta syhnał, kab jamu nijakich karupcyjnych prapanovaŭ nie rabić, kanverty z hrašyma lepš schavać, i pryznačyć ich na inšyja mety.
Kardyjochirurh prafesar Bohdan Marušeŭski z Centra zdaroŭja dziciaci ŭ Varšavie skazaŭ, što hetaj akcyjaj lekary imknucca abaraniać dobraje imia prafesii, jakoje apošnim časam hańbiać sensacyjnyja paviedamleńni ŚMI. Pavodle Marušeŭskaha, takija pavodziny žurnalistaŭ nie dapamahajuć chvorym i pieraškadžajuć sumlennym lekaram pracavać. Praściej apaviaščać adzinočny skandalny prykład, čym havaryć pra sumburnuju, ale sumlennuju pracu lekaraŭ.
B. Marušeŭski: Mnie nie padabajecca, kali mianie abražajuć, a ja adčuvaju siabie častkaj hetaha asiarodździa j hetaj prafesii. Heta pieraškadžaje taksama pacyjentam. Pacyjent pavinien mieć davier da lekara. Viedać, što heta sumlenny čałaviek, prystojny j kampetentny.
Staršynia Hałoŭnaj lekarskaj rady Kanstanty Radzivił čakaje, što akcyja razburyć steratypy, i padkaža, što jość inšyja metady akazańnia ŭdziačnaści, čym uručeńnie «kanvertu».
K. Radzivił: Čałaviek čałavieku moža prosta padziakavać. Napeŭna mohuć być zvyčajnyja kvietki j cukierki, jakija nie parušajuć dobraha stylu. Ja źviartajusia da pacyjentaŭ, kab jany takim čynam akazvali udziačnaść lekaram, jakija lečać ich blizkich.
Ekspert Fundacyi Batoraha Hžehaž Lubaiński ličyć, što akcyja usio ž taki nie źjaŭlajecca dobraj idejaj. Karupcyja nia maje ničoha supolnaha z zarobkami. Jon skazaŭ, što z daśledvańniaŭ, u jakich jon udzielničaŭ, vynikaje, što najbolš biaruć tyja, chto najlepš zarablaje.
H. Lubainski: Hrupa, jakaja biare chabar, heta nia tyja, chto najmienš zarablaje, a tyja, pra kaho zhadvajuć usie raparty — hrupa ardynataraŭ i prafesaraŭ — značyć tyja, chto najlepš zarablajuć.
Lekary damahajucca, kab ich zarpłata nie była mienšaj, čym 5 tys. zł — to bok 1700 dalaraŭ, albo 11 dalaraŭ za hadzinu.
Ciapier lekar na stažyroŭcy zarablaje kala $370. Takaja zarpłata prymušaje lekaraŭ padzarablać na niekalkich štatach i pracavać bieź pierapynku dvoje, a byvaje, i troje sutak.
A kali da hetaha jašče dadać niedachop medycynskich kadraŭ u Polščy, to atrymlivajecca nia vielmi cikavaja karcina.
