BT-2 pasunie ORT u efiry
Uradavaja narada pastanaviła: BT-2 — być! Jahonym šefam stanie Ivan Paškievič. Stvaracca kanał budzie na bazie Paškievičavaha «Miru». Praŭda, bazy toj zamała — napeŭna, zahadajuć Kisialu padzialicca. ORT pierakryjuć, zatoje RTR abiacaje investycyi. Chutčej za ŭsio, spačatku rasiejski kanał pierakryjuć častkova — asnoŭnyja zabaŭki pakinuć, a infarmacyjnyja prahramy zamieniać.
Budziem advykać žyć rasiejskimi — dumskimi j čačenskimi —turbotami. Darečy, jak pakazvaje dośvied radyjo «Mir», patronam jakoha toj samy Paškievič, tam choć i panuje rasiejščyna ŭ muzycy j navinach, ale j biełaruskaje — nia redki hość, i nie zabyvajucca, što na śviecie isnujuć Ukraina, Polšča i inšyja macieryki.
Z uviadzieńniem druhoha kanału aŭtamatyčna pavialičycca kolkaść (mo, dziela kankurencyi, i jakaść) biełaruskich navinaŭ. Važna taksama, što ŭ krainie buduć zastavacca vialikija reklamnyja hrošy i źjaviacca novyja pracoŭnyja miescy.
Adno niepakoić — na naradzie, akramia Zamiatalinych, siadzieŭ i kiraŭnik biełaruskaha adździaleńnia aficyjoznaha rasiejskaha «Interfaksu» sp.Ziańkovič. Jak by nam rasiejski aliharchičny pohlad nie zamianili na rasiejski słužbiscki...
Ciapier na paradku dnia hałoŭnym budzie stajać pytańnie jakaści biełaruskich telekanałaŭ.
Arciom Łukjanovič
