Naviny
Abakrali Papova na 40 tysiač
Hałoŭny trener biełaruskaj bijatlonnaj zbornaj Alaksandar Papoŭ kiravaŭ u aeraport, kab vylecieć u Narvehiju, dzie biełarusy 19-ha mielisia ŭziać start u čempijanacie śvietu. Vypraŭlaŭsia sp.Papoŭ nie z pustymi rukami — vioz na patreby kamandy 40 000 dalaraŭ, atrymanych u Ministerstvie sportu j turyzmu. Adnak hetaha treneru padałosia małavata, dy jon vyrašyŭ zaskočyć u suvenirny adździeł CUMu. Torbačku z hrašyma koŭč nie pakinuŭ u mašynie, a zachapiŭ z saboj u kramu... Pra toje, što adbyłosia ŭ CUMie, mała kamu viadoma. Ale kruhleńkaja suma źnikła. Šakavany Papoŭ adrazu ž paśla vyjaŭleńnia prapažy padaŭ zajavu ŭ Pieršamajski RUUS. Tut ža hora-skarbnika aryštavali, ale nieŭzabavie adpuścili.
Tym časam Ministerstva sportu lichamankava šukała novyja hrošy, kab bijatlanisty ŭsio ž mahli vystupić. Hrašovuju prablemu niejak vyrašyli, ale zastałasia «prablema Papova». Hałoŭny trener kamandy nie palacieŭ u Osła «z-za drennaha stanu zdaroŭja». U jaho zdaryŭsia sardečny prystup. Ale jaho mabyć tak i tak nie puścili b u Narvehiju, bo padazrajuć, što jon sam i skraŭ hrošy.
Chto ž vinavaty va ŭsioj hetaj niepryjemnaj historyi? Ci ž nie mahli vydać słavutamu Papovu hrošy čekam abo kredytnaj kartkaj? A mo niechta specyjalna daŭ najaŭnyja dalary, kab paśla ich spakojna možna było skraści?
Bohuś Bijatlanienak
A my pisali, što Čmara nia sknara...
Kali niechta dumaŭ, što stary dzied Vasil Staravojtaŭ paśla vyzvaleńnia spakojna ŭzdychnuŭ, dyk pamylaŭsia. Sudździa Čmara sprabuje zabrać u jaho i paŭdamy, jakija toj maje ŭ Krymie. Dziela čaho dasłała ŭ Viarchoŭny sud Krymu prośbu padtrymać rašeńnie Kiraŭskaha rajonnaha sudu i pieradać u vałodańnie biełaruskaj dziaržavy pryvatnuju majomaść Staravojtava. Naturalna, hieroj sacpracy, staršynia bahataha kałhasu, nia byŭ biednym čałaviekam, moh dazvolić sabie i krymskuju daču. Advakat Staravojtava Viera Stramkoŭskaja taksama dasłała ŭ Krym list, u jakim źviartaje ŭvahu na palityčnuju pryrodu pracesu nad Staravojtavym i prosić sud adchilić zapyt Čmary.
Symon Hłazštejn
Dapamoha – 4 dalary
Na pačatak lutaha na Kryčaŭščynie byli 504 biespracoŭnyja. Za studzień stali na ŭlik 104 čałavieki. 262 z zarehistravanych biespracoŭnych atrymlivajuć hrašovuju dapamohu, pamier jakoj u studzieni byŭ 3267 rubloŭ. Nadoj ža na adnu karovu ŭ Kryčaŭskim rajonie składaje sioleta 2,4 litry małaka ŭ dzień. Samy vysoki pakazčyk u kałhasie «Vialiki Kastryčnik» — 4,2 ł, samy nizki — u kałhasie «Dziahavičy» — 0,5 ł. Lepš by hetyja hora-kałhaśniki byli biespracoŭnymi, čym tak bydła mučyć, što jano ŭžo bolej i nia doicca.
A.Kuźmin
Baraćba za harełku
Mahiloŭski hałoŭny načalnik Dražyn paviedamiŭ, što chutka źmieniać dyrektara Mahiloŭskaha likiora-harełačnaha zavodu. Heta stała vynikam adkrytaha lista staršyni Klimavickaha rajvykankamu, pra jaki my paviedamlali. Tady było niezrazumieła, kaho abvinavačvaŭ vertykalny i chto pieraškadžaŭ jamu dobra pracavać. Ciapier usio zrazumieła. I chacia kamisii zavod pravieryli, niedachopaŭ nie znajšli, ale dyrektara źniać treba. Hetak praciahvajecca baraćba za «chlebnaje» kresła. MŁHZ — z redkich pradpryjemstvaŭ, što dajuć prybytak. Raniejšy dyrektar, Michaił Biełavusaŭ, prapanoŭvaŭ, kab zavod urad zabraŭ z abłasnoha padparadkavańnia i vyzvaliŭ ad miascovych padatkaŭ. Abłasnyja ŭłady hetaha nie paciarpieli.
Symon Hłazštejn, Mahiloŭ
Pabiŭ dačku
Luty vypadak byŭ u Čerykavie na vuł.Leninskaj. Č., byŭšy ŭ nadzvyčaj mocnym uzbudžeńni, źbiŭ svaju jašče nie darosłuju dačku na horki jabłyk, tak, što daktary «Chutkaj dapamohi» ŭ mašynu nieśli jaje na rukach. Ciapier učastkovy raźbirajecca.
A.Kuźmin, Kryčaŭ
Kaho bajacca, taho j dušać
Na pasiedžańni kamisii, jakoj kiruje pałkoŭnik Zamiatalin, vyrašyli pakul nie rehistravać Partyju BNF. Letaś u śniežni łukašenkaŭcy pryniali normu, pavodle jakoj u nazvach partyjaŭ i arhanizacyjaŭ zabaroniena ŭžyvać słovy «narodny» j «nacyjanalny». Sojm Biełaruskaha Narodnaha Frontu musiŭ udakładnić nazvu, źvioŭšy jaje da prosta «BNF», biez rasšyfroŭki.
Adnak rašeńnia pra pierarehistacyju Partyi BNF i Hramadzkaha abjadnańnia BNF «Adradžeńnie» partyja tak i nie dačakałasia. Vincuk Viačorka ŭžo zajaviŭ, što partyja maje dastatkova dośviedu padpolnaj pracy, ale paćvierdziŭ, što partyja budzie dabivacca pierarehistracyi. Jak viadoma, bolšaść partyjaŭ, u tym liku j KCHPBNF, prajšli pierarehistracyju bieź pieraškodaŭ.
B.T.
Napad na biełarusaŭ
U horadzie Hrajevie ŭ Padlaskim vajavodztvie Polščy 19 lutaha adbyŭsia napad na hramadzian Biełarusi. Palicyja zatrymała napadnikaŭ. Pra heta paviedamiła Biełastockaje radyjo.
A było tak. Na vuł.Kapiernika stajała mašyna «Nissan», u jakoj siadzieli čatyry biełarusy. Da mašyny padyšli čatyry palaki, adzin pastukaŭ u šybku i zapatrabavaŭ harełki i cyharet. Našy admovili, adzin pry hetym schavaŭ kašel z hrašyma pad siadušku. Zaŭvažyŭšy heta, palak bejsbolnym kijem raźbiŭ šybku i pačaŭ bić uładalnika hrošaj. Astatnija napadniki, rastruščyŭšy šybki, užyli kastety. Našy pačali lamantavać. Palaki adbiehlisia na paru metraŭ i stali zakidvać ich kamieńniem. Hetym časam prajaždžała patrulnaja mašyna, jakaja zabrała ŭsich napadnikaŭ. Zhodna z infarmacyjaj palicyi, im ad 19 da 23 hadoŭ, usie — žychary Hrajeva.
Horad Hrajeva znachodzicca na zachad ad Biełastoku, z 15 studzienia 1940 h. byŭ rajcentram Biełastockaj vobłaści BSSR.
Siarhiej Maksimovič
