Ahlad siarednieeŭrapiejskich padziejaŭ
NATO la Vostraj Bramy
U paniadziełak u Vilni pačniecca sesija Parlamenckaj asamblei NATO. U joj voźmuć udzieł nia tolki delehacyi paŭnavartasnych čalcoŭ chaŭrusu, ale j asacyjavanych siabroŭ. Na hetaj sesii PA NATO maje pryniać pastanovy ab stanoviščy na Bałkanach i pašyreńni NATO na ŭschod, u vyniku jakoha Vostraja Brama ŭžo ŭ 2004 h. moža apynucca pad achovaju Paŭnočnaatlantyčnaha aljansu.
U Estonii raście eŭraskieptycyzm. Ažno 59% estoncaŭ nia chočuć uvachodu krainy ŭ Eŭraźviaz – takija vyniki apytańnia, praviedzienaha na minułym tydni. Tolki ŭ Estonii z usich krainaŭ-kandydatak eŭraskieptyki składajuć balšyniu. Na pačatku miesiaca kiraŭnik estonskaha MZS Toma Hiendryk Ilves zajaviŭ, što Estoniju, Łatviju i Letuvu łučyć tolki “nehatyŭny dośvied minuŭščyny”. Pry kancy minułaha hodu hałava estonskaha MZS abviaściŭ, što Estonija — nie “bałtyjskaja kraina”, a “postsavieckaja skandynaŭskaja”.
Łatyski ŭrad abaviazaŭ miascovyja ŭłady vydzielić u kožnym horadzie, u jakim žyvie bolš za 20 tys. čałaviek, kvartał “čyrvonych lichtaroŭ”. Hetaje rašeńnie źjaŭlajecca častkaj uradavaj prahramy kantrolu za prastytucyjaj. Sproby kantrolu nad nielehalnaj, ale taleravanaj prastytucyjaj robiacca nie ŭpieršyniu.
Rasiejski premjer Kaśjanaŭ naviedaŭ Polšču, dzie pytańniem pieramovaŭ była sprava pabudovy novaha hazapravodu ŭ abychod Ukrainy. Na tydni kamitet ekspertaŭ mižnarodnaha kansorcyjumu, u jaki ŭvachodziać “Hazprom”, francuski Gaz de France, italjanski Snam, niamiecki Ruhrgas i Wintershall dy Polski naftahazavy kancern, nie zvažajučy na polskija piarečańni, abraŭ prapanavany Rasiejaj varyjant prachodžańnia trasy: Kobryń (Biełaruś) — Vielkie Kapušany (Słavaččyna). Ad Biełarusi ŭ kansorcyjum nie ŭvachodzić nijakaja struktura.
U Rumynii ŭstupiła ŭ siłu pastanova, pavodle jakoj u miascovaściach, dzie nacyjanalnyja mienšaści składajuć bolš za 20% nasielnictva, na movie hetych mianšyniaŭ možna dublavać šyldy, vykarystoŭvajučy jaje jak druhuju aficyjnuju. Dla Rumynii heta doŭhačakany krok, bo adnych vuhorcaŭ žyvie tamaka 1,7 młn. U bližejšym časie rumynskija vuhorcy mieracca adčynić i svoj universytet. Rumynskija pravyja skosa pahladajuć na hetyja źmieny. U transylvanskim horadzie Kłuž burmistar Hieorhie Funar abvinavaciŭ vuhorcaŭ, što jany masava zvoziać u miesta ciažarnych kabietaŭ, kab pierakročyć žadany 20%-ny paroh.
U Vuhorščynie iduć sprečki vakoł adzinaj u krainie AES u Pakšy, što vyrablaje bolš za 40% elektraenerhii dziaržavy. Vuhorskija zialonyja patrabujuć začynić jaje, ale schod akcyjaneraŭ uchvaliŭ prajekty investycyjaŭ u pašyreńnie stancyi, bo ŭ 2008 h. vychod́zić termin ekspluatacyi pałovy enerhablokaŭ. Kiraŭnictva stancyi nastojvaje na biaśpiečnaści pradpryjemstva, abapirajučysia na acenki zachodnieeŭrapiejskich ekspertaŭ. Zialonych ža niepakoić toj fakt, što ŭ ZŠA začynili piać atamnych reaktaraŭ, analahičnych pakšaŭskamu. Haspadary stancyi abaviazalisia nakiravać uvieś letašni prybytak ŭ rezervovy fond palapšeńnia biaśpieki stancyi.
U Białhradzie sustrelisia prezydent Juhasłavii Kaštunica i sustaršyni Bośnii i Hiercahaviny serb Žyŭka Radzišyč, musulmanin Beryz Bełkič dy charvat Joza Kryžanavič. Hałoŭny vynik sustrečy: serby jašče raz aficyjna paćvierdzili, što adrakajucca terytaryjalnych pretenzijaŭ da Sarajeva. Amerykanskija ŭradavyja koły ŭ adkaz zajavili, što vojski NATO nieŭzabavie mohuć pakinuć Bośniju.
Siarhiej Rak
