Niabačnyja vajary Džyhadu
Palavańnie na ben Ładena vyjaviłasia nialohkaj spravaj. Jašče składaniej budzie zmahacca ź jahonym raskidanym pa ŭsim śviecie, u tym liku i ŭ samich ZŠA, niabačnym vojskam. Bo ŭ hetym vypadku amerykancy i ich nataŭskija chaŭruśniki majuć praciŭnika z absalutna inšaha cyvilizacyjnaha vymiareńnia.
Ben Ładen i jahonyja vajary nie trymajucca pryniatych na Zachadzie metadaŭ viadzieńnia vajennych dziejańniaŭ. Sama kancepcyja vajskovaje hijerarchii ź jejnymi hienerałami, pałkoŭnikami, hałoŭnymi štabami, aperatyŭnym planavańniem, pavietranym i marskim vyviedam nie ŭłaścivaja “vajaram Ałłaha”. Ben Ładen ličyć tradycyjnyja isłamskija metady viadzieńnia vajny našmat efektyŭniejšymi za zachodnija. Uzory, jakimi jany kirujucca, — chalif Amar, jaki ŭ VII st. pieramoh vojski Bizantyjskaj imperyi, abo sułtan Saładzin, jaki ŭ XI st. uščent raźbiŭ eŭrapiejskich kryžakoŭ. Saładzin, darečy, byŭ nie arabam, a kurdam, i jahonaje vojska składałasia ź nievialikaha jadra addanych jamu asabista kamandziraŭ i raskidanych pa roznych krajoch “rezervistaŭ”. Pry pahrozie vajny ich sklikali admysłovyja pasłancy. Pa svajoj struktury vojska ben Ładena nahadvaje siaredniaviečnaje vojska Saładzina. Pavodle źviestak izrailskich specsłužbaŭ, niekalki dziasiatkaŭ takich pasłancoŭ vypravilisia mabilizavać jahonuju niabačnuju armiju jašče 9 vieraśnia, za dva dni da ataki na Suśvietny handlovy centar i Pentahon. Adny pajšli pa isłamskich medrese dy inšych duchoŭnych ustanovach Aŭhanistanu, u jakich naličvajecca kala miljona vučniaŭ. Druhija musili naviedać 10 tys. medrese ŭ susiednim Pakistanie, dzie ben Ładen maje pad 70 tys. prychilnikaŭ. Kožny zaklikany vajar atrymlivaje asabistuju zbroju z admysłovaha, prychavanaha na taki vypadak arsenału.
Takija duchoŭnyja škoły zusim nie padobnyja da zachodnich kaledžaŭ dy ŭniversytetaŭ, bo asnoŭnaj metaj majuć vajskovuju i idealahičnuju padrychtoŭku budučych vajaroŭ Džyhadu, hatovych biez vahańniaŭ achviaravać žyćciom. Vučycca siudy pryjaždžajuć navat pradstaŭniki radykalnych isłamskich hrupovak murynaŭ ZŠA, nakštałt “Čornych panteraŭ”. Aproč Kur'anu, jany vyvučajuć teoryju viadzieńnia partyzanskaj vajny, u tym liku ŭ haradzkich umovach, arhanizacyju dyversijaŭ, vyrab i vykarystańnie vybuchovych prystasavańniaŭ, chimičnaj i bakteryjalahičnaj zbroi, vykarystańnie zvyčajnaj zbroi dla baraćby z samalotami, hielikopterami i tankami niepryjaciela, umieńnie doŭhi čas vyžyvać biaź ježy i vady.
Niabačnaje vojska ben Ładena — heta nie natoŭp fanatykaŭ-ciemrašałaŭ, a dobra navučanaja armija addanych isłamu vajaroŭ, što, pavodle samych ścipłych padlikaŭ, naličvaje niekalki dziasiatkaŭ tysiač čałaviek. Pa bajavych jakaściach samyja padrychtavanyja ź ich nie sastupajuć bajcam elitnych padraździaleńniaŭ “Delty”, “rejndžeraŭ” dy “zialonych baretaŭ” ZŠA, brytanskich S.A.S. ci biełaruskich “Ałmazu” i “Alfy”. Niekatoryja patencyjnyja vajary ben Ładena prajšli navučańnie ŭ instruktaraŭ-musulmanaŭ, jakija słužyli ŭ rozny čas u 101-j i 82-j pavietrana-desantnych dyvizijach ZŠA.
Aproč armii, što składajecca z žycharoŭ Aŭhanistanu j Pakistanu, u Al-Kajdy jość jašče kamandziry-suviaznyja ŭ Paŭnočnaj Amerycy, Jemenie, Savudaŭskaj Arabii, Albanii, Kosavie, Alžyry, Čačenii, Tadžykistanie, Ehipcie, Etyjopii, Samali dy na Filipinach.
Na kožnaha kamandzira prypadaje peŭnaja kolkaść vajaroŭ. Tak, u Paŭnočnaj Amerycy naličvajuć blizu 2,5 tys. asabista addanych ben Ładenu ludziej, u Jemenie, adkul u svoj čas siamja ben Ładena pierajechała ŭ Savudaŭskuju Arabiju, ich kala 2 tys. Aproč taho, ben Ładen maje dobryja stasunki ź Isłamskaj vyzvolnaj armijaj (IVA), jakaja składajecca z 20 tys. čałaviek i trymaje manapoliju na handal zbrojaj na Arabijskim paŭvostravie, mysie Horn, u rehijonie Čyrvonaha mora i va Ŭschodniaj Afrycy. Sam ben Ładen nieadnarazova dapamahaŭ IVA ŭ hrašovych aperacyjach pry handli zbrojaj i admyvańni hrošaj. U Savudaŭskaj Arabii, dzie žyvuć bahatyja i ŭpłyvovyja svajaki ben Ładena, Asama maje paśladoŭnikaŭ navat u šerahach uzbrojenych siłaŭ i nacyjanalnaj hvardyi. Vidać, dziakujučy im ben Ładen maje dostup da samaj sučasnaj zbroi, što znachodzicca na ŭzbrajeńni ŭ savudaŭskaha vojska.
Pavodle niekatorych acenak, u peŭnych abstavinach pa ŭsim śviecie Asama moža adnačasova ŭźniać na vajnu dziasiatki tysiač čałaviek. Pakul bolšaść ź ich biare ŭdzieł tolki ŭ razavych aperacyjach, a ŭ pierapynkach pamiž imi žyvuć zvyčajnym mirnym žyćciom. Pad 100 takich čałaviek jość i ŭ ZŠA, i ŭ inšych zachodnich krainach. Jany majuć siemji, ale žonki j syny časta nie padazrajuć pra padvojnaje žyćcio ichnych mužoŭ i baćkoŭ. Hetyja bajeviki ničym siabie nie vydajuć da času. Takija zaprahramavanyja na vykanańnie adzinaha samazabojčaha daručeńnia “adzinokija vaŭki” hatovyja nanieści navat bakteryjalahičnyja dy chimičnyja ŭdary. Jašče 150 terarystaŭ-kamikadze raskidanyja pa Paŭnočnaj Amerycy, Eŭropie i Blizkim Uschodzie ŭ jakaści rezervu.
Sietku ben Ładena možna nazvać terarystyčnaj arhanizacyjaj novaha typu. U śviecie, jaki staŭ adzinym cełym dziakujučy raźvićciu srodkaŭ transpartu, kamunikacyi i masavaj infarmacyi, i sietka terarystaŭ raspaŭsiudziłasia na ŭvieś śviet, i mety jana stavić sabie hlabalnyja: padryŭ stabilnaści ŭsiaho śvietu. Strymlivaje ich tolki niedastupnaść sučasnych technalohij i niajmieńnie mahutnych ŚMI.
Uładź Baranič
