Naviny Litvy
Nia chočuć žanicca
Usio bolej litoŭcaŭ žyvuć nie raśpisaŭšysia. Letaś u Litvie było zarehistravana tolki 10 tys. šlubaŭ, tady jak dziesiać hadoŭ tamu hetaja ličba składała 35 tys.
2000 francuzaŭ
i 5 rasiejcaŭ
Sioleta budaŭniki znajšli ŭ Vilni, na terytoryi byłoj savieckaj vajskovaj bazy, vializnyja brackija mahiły z pareštkami 2 tys. čałaviek. Huziki i elementy strojaŭ śviedčać, što heta byli žaŭniery francuskaha vojska, jakija zahinuli ŭ 1812 h. A padčas budaŭnictva novaha mostu Mindoŭha na levym bierazie Nerysu rabočyja natrapili na pareštki piaci žaŭnieraŭ savieckaha vojska, zabitych u 1944 h. Tamsama byŭ znojdzieny orden, jaki dapamoža ŭdakładnić asobu adnaho z žaŭnieraŭ.
U Miensk — najtańniej
U Litvie na tracinu źmienšylisia taryfy na telefonnyja razmovy ź Biełarusiaj. Ciapier heta samaja tannaja pasłuha na rynku mižnarodnaj telefonnaj suviazi. Užo treciaje sioleta źnižeńnie telefonnych taryfaŭ tłumačycca ŭzmacnieńniem kankurencyi na hetym rynku.
A kolkaść karystalnikaŭ mabilnaje suviazi ŭ Litvie letaś pavialičyłasia na 81%. Pavodle prahnozaŭ, rynak pasłuhaŭ mabilnaj suviazi i prodažu adpaviednaha abstalavańnia budzie pašyracca samymi chutkimi ŭ krainie tempami j sioleta.
Aściarožna — Biełaruś!
Litoŭskija kanservatary vinavaciać Sojm, u jakim ciapier majuć bolšaść sacyjał-demakraty, u pamknieńniach da supracoŭnictva ź “niedemakratyčna sfarmavanym” parlamentam Biełarusi. Heta moža pieraškodzić, jak ličać kanservatary, ustupleńniu Litvy ŭ NATO. Jany kažuć, što majuć źviestki pra chutkuju “surjoznuju reakcyju” ZŠA na prodaž Biełarusiaj zbroi Iraku.
Šeść piechacincaŭ u Vilni
U litoŭskaj stalicy źjaviŭsia adździeł marskoj piachoty ZŠA. Šaściora žaŭnieraŭ buduć ciapier achoŭvać amerykanskuju ambasadu. Źjaŭleńnie novaj achovy tłumačycca pavieličeńniem značnaści ambasady j ŭvahi da Litvy z boku ZŠA.
Litva pabačyła
“Zamach na Rasieju”
Litoŭskaje telebačańnie pakazała film “Zamach na Rasieju”, jaki ŭ samoj Rasiei zabaraniła Duma. U filmie, źniatym francuzami na hrošy medyjamahnata Barysa Bierazoŭskaha, davodzicca, što vybuchi ŭ Maskvie j inšych haradach Rasiei ŭvosień 1999-ha — pravakacyja rasiejskich specsłužbaŭ. Tyja vybuchi vyklikali eskalacyju vajny ŭ Čačenii i spryjali papularnaści Pu-cina na prezydenckich vybarach.
Lituanizacyja
Ministerstva adukacyi Litvy dazvoliła vypusknikam nacyjanalnych škołaŭ nie zdavać ispytaŭ pa rodnaj movie, a taksama parekamendavała vykarystoŭvać u vypusknych klasach litoŭskija padručniki. Heta vyklikała pratesty z boku nacyjanalnych mienšaściaŭ. Kala tysiačy palakaŭ zładzili la budynku Sojmu mitynh pratestu, patrabujučy adkryćcia ŭ Vilni polskamoŭnaj VNU.
Satanisty raśpierazalisia
Departament dziaržaŭnaj biaśpieki Litvy vyvučaje dziejnaść padpolnaj satanisckaj arhanizacyi “Bractva ciemry”, jakaja naličvaje z paŭsotni siabroŭ. Jany stvaryli internet-sajt dy ździejśnili letaś kolki aktaŭ vandalizmu na mohiłkach. Prapahandu satanizmu litoŭskija specsłužby razhladajuć jak raspalvańnie relihijnaj varožaści.
Pavodle vilenskich hazetaŭ padrychtavaŭ Michał Čarvinski
