ab usim patrochu
Try tysiačy mienčukoŭ
prasłuchali kazki
Mienskaja telefonnaja sietka z 4 kastryčnika ŭviała novuju pasłuhu — kazki dla dziaciej pa telefonie. Kožny dzień pa telefonie 096 dla dziaciej Miensku hučyć novaja kazka. Kaštuje takaja pasłuha 22 rubli za chvilinu, i prasłuchać kazku možna i dniom, i viečaram. Dla kožnaha abanenta kazka budzie hučać ad pačatku. Daŭžynia kožnaje kazki składaje ad 5 da 15 chvilinaŭ. Heta krychu bolej za čas, adviedzieny na kazki, naprykład, u telefonnych sietkach Maskvy: tam jany doŭžacca 5—8 chvilinaŭ.
Padrychtavanaja fanateka MHTS źmiaščaje pa 25 kazak pa-rasiejsku i pa-biełarusku, ahučanych dyktaram televizii Tacianaj Maciušenkaj. Hetaha zapasu chopić na najbližejšyja 2 miesiacy. Potym supracoŭniki telefonnaj sietki miarkujuć dadavać novyja kazki.
Jak adznačajuć supracoŭniki MHTS, novaja pasłuha ŭžo vyklikała vialikuju cikaŭnaść. Na vychodnych 5—6 kastryčnika kolkaść telefanavańniaŭ pierasiahnuła 3000. Pryblizna na takuju kolkaść telefanavańniaŭ i raźličvała MHTS, uvodziačy novuju pasłuhu.
Aprača kazak, MHTS ciapier uviała taksama infarmavańnie pra kinaafišu Miensku (091), načnyja dyskateki (092), adrasy kruhłasutačnych kramaŭ (093), haraskopy dla ŭsich znakaŭ Zadyjaku (094), štodzionny prahnoz nadvorja (095). Košt kožnaje takoje pasłuhi taksama składaje 22 rubli za chvilinu. Jak zaśviedčyli “NN” u kiraŭnictvie Mienskaj haradzkoj telefonnaj sietki, najbolšaja kolkaść zvarotaŭ prypała na numar 094: daznacca svaje haraskopy na vychodnyja pažadali amal 3500 žycharoŭ Miensku.
A.Š.
U “Spadčyny” novy redaktar
Novym hałoŭnym redaktaram časopisu “Spadčyna” zamiž Zachara Šybieki staŭ Alaksiej Chadyka.
Jak jon zaznačyŭ dla “NN”, hałoŭnaja zadača, jakaja siońnia staić pierad redakcyjaj, — adnavić rehularny vychad vydańnia. Najbližejšy numar, pryśviečany Polščy, — u stadyi makietavańnia, jon pavinien vyjści pry kancy miesiaca. Paśla jaho ŭbačać śviet “ukrainski” i “ekanamičny” numary.
Nadalej A.Chadyka miarkuje zrabić “Spadčynu” samaakupnaj: “My adnovim padpisku: jana zaŭždy davała vielmi vysoki ŭzrovień akupnaści časopisu — bolš za 50%. Aproč taho, vydańnie maje daŭnija tradycyi i vialiki intelektualny patencyjał. Tamu my miarkujem pradavać intelektualnyja pradukty “Spadčyny”. Naprykład, naładzić vypusk kalendaroŭ i h.d.”. Palepšycca j afarmleńnie časopisu — pabolšaje ilustracyjaŭ, u tym liku kalarovych. Novy redaktar planuje taksama zrabić časopis recenzavanym, “VAKaŭskim” (ad VAK — Vyšejšaja atestacyjnaja kamisija), kab publikacyi ŭ časopisie zaličvalisia navukoŭcam-historykam padčas abarony dysertacyjaŭ. Nivodzin niedziaržaŭny časopis nia maje takoha prava. Tamu publikacyja ŭ hruntoŭnych, ale nierecenzavanych “Biełaruskim histaryčnym ahladzie” i “Spadčynie” vyhladaje nibyta mienš prestyžna, čym u “Biełaruskim histaryčnym časopisie” ci “Viestkach Akademii navuk”. “Recenzavańnie dazvolić uźniać prestyž “Spadčyny” i pašyryć koła aŭtaraŭ”, — upeŭnieny A.Chadyka.
A.Š.
Bondar na bočcy
Litaraturna-vydavieckaja bočka “Litaratura i mastactva”, jakaja paśla sychodu Siarhieja Kaściana zastałasia biaz bondara, iznoŭ jaho atrymała. Praŭdziviej, heta bondarka: 7 kastryčnika kiraŭnicaj chołdynhu była pryznačanaja paetka Taisa Bondar.
Źmieny ŭ kiraŭnictvie chołdynhu adlustravali vynik baraćby pamiž hrupoŭkami Siarhieja Kaściana i ministra infarmacyi Michaiła Padhajnaha. Na źjeździe Sajuzu piśmieńnikaŭ 24 vieraśnia M.Padhajny pakajaŭsia ŭ niapravilnaj kadravaj palitycy pry arhanizacyi chołdynhu, i voś plon — pastaviŭ kiraŭnicaj viadomuju biełaruskuju paetku.
Pieravod časopisu “Vsiemirnaja litieratura” na biełaruskuju movu, zadumany S.Kaścianam, ciapier naŭrad ci adbudziecca. Tak kaža sama biełaruskaja paetka ŭ kamentary dla “NN”: “Heta vielmi specyfičny časopis, tamu ja liču, što jon pavinien vychodzić pa-rasiejsku”.
Staršynia Sajuzu piśmieńnikaŭ Aleś Paškievič ad kamentaroŭ nakont pryznačeńnia T.Bondar kiraŭnicaj chołdynhu ŭstrymaŭsia.
Arkadź Šanski
Pieršaja sprava Ksandera Kiejdža
“Try iksy” ŭ Miensku
Chto taki Džejmz Bond, viedajuć navat tyja, chto nikoli nia čuŭ pra Jana Fleminha i nia bačyŭ nivodnaha filmu z tak zvanaj “bandyjany”. Jašče b! Adoleŭšy stolki padonkaŭ, kožny ź jakich abaviazkova chacieŭ źniščyć śviet, niepieramožny supracoŭnik brytanskich “orhanaŭ” daŭno zrabiŭsia źbiralnym vobrazam usich špijonaŭ.
Ale całkam mahčyma, što słava Bonda zastaniecca ŭ minułym stahodździ. Sučasnuju moładź nia vabić bondaŭski kanservatyzm — ad klasyčnaha stylu adzieńnia i biezdakornych manieraŭ da “pravilnaha” śvietapohladu. Jana chacieła b bačyć hieroja, bolš “blizkaha da narodu”.
Studyja “Kałambija Pikčerz” pastarałasia heta ŭličyć, vypuskajučy na ekrany film “Try iksy”, što voś užo druhi tydzień demanstrujecca i ŭ Miensku. “Bandyjana” zaŭsiody cikaviła bosaŭ “Kałambii”, niekali jany navat sprabavali adsudzić pravy na persanaž superahienta ŭ studyi “MGM”, ale nie atrymałasia. Niezdarma ŭ 2000 h. źjavilisia “Anioły Čarli”, dzie funkcyi Bonda vykonvajuć try krutyja dziaŭčyny. Atrymaŭšy niebłahuju “kasu”, film całkam moh stacca pačatkam novaha špijonskaha seryjału. Taho samaha ciapier čakajuć ad “Troch iksoŭ”.
Praŭda, Ksander Kiejdž (jakoha ihraje Vin Dyzeł, viadomy hledačam pa filmach “Vyratavać radavoha Rajana”, “Čornaja dzirka” i “Farsaž”) moža pretendavać chutčej na rolu “anty-Bonda”. Ksander “palicejskich akademijaŭ” nie kančaŭ, i prahnie jon nie słužyć hramadztvu, a žyć dla siabie. Hałoŭnaje dla jaho — kab u kryvi byŭ naležny ŭzrovień adrenalinu. Ksandera nie asabliva chvaluje los śvietu, i ratavać jaho (pa prapanovie specsłužbaŭ) Kiejdž biarecca tolki tamu, što inačaj jamu pahražaje turma za raniejšyja “podźvihi”.
Jaho adpraŭlajuć u Prahu, dzie “kiepskija dziadźki” ŭ asobie adstaŭnoha rasiejskaha aficera Jorhi (jaho rolu vykonvaje novazelandziec Marcin Cokas) i kampanii zadumvajuć niešta niadobraje. Majučy “prystojnuju” dla złačynnaha śvietu reputacyju, Ksander paśpiachova ŭcirajecca ŭ davier da Jorhi. Spačatku zadańnie zdajecca prostym: zdabyć infarmacyju. Ale čym dalej, tym bolš adkaznaści kładziecca na jahonyja plečy…
Mnohija siužetnyja momanty “Troch iksoŭ” pieraciahnutyja z “bandyjany” dy inšych bajevikoŭ (jak vobraz mazhavitaha vučonaha, što stvaraje ahientu raznastajnyja superprystasavańni). Ničym asablivym siarod inšych niahodnikaŭ nie vyłučajecca i “typovy rasiejec” Jorha. Chiba pryncypovym anarchizmam.
Dyj hałoŭny hieroj nie taki chulihan, jak zdajecca spačatku. Tak, jon nehatyŭna stavicca da kureńnia i pje tolki dla taho, kab “raskałoć” bandytaŭ. I naahuł noraŭ maje dobry.
Trukaŭ i ekšenu ŭ filmie, badaj, nia mieniej, čym u apošnich stužkach “bandyjany”. Mnohija sceny sapraŭdy ŭražvajuć — jak epizod ź lavinaj. Zatoje žorstkaha hvałtu j paścielnych scenaŭ u “Troch iksach” niama, tamu film całkam prydatny dla prahladu luboj aŭdytoryjaj. Upryhožvaje stužku, viadoma, i Praha, jakaja asabliva dobra hladzicca ŭ tyja chviliny, kali joj pahražaje źniščeńnie ad ruk nikčemnych terarystaŭ.
Plusoŭ u filmie jaŭna bolš, čym iksoŭ, tamu pahladzieć jaho varta, va ŭsiakim razie amataram bajevikoŭ.
S.P.
Kino krainy “Barandaŭ”
Jakija filmy varta pahladzieć
u časie retraspektyvy českaha kino
Českaje kino siońnia ŭ roskvicie. Paśla “novaj chvali” 60-ch, jakaja padaravała śvietu Iržy Miencela, Vieru Chiciłavu i Miłaša Formana, jano znoŭ nabiraje abaroty.
Zdymačnyja placoŭki zahružanyja, amerykancy aktyŭna zdymajuć u Prazie, českija filmy zaprašajuć na prestyžnyja festyvali. A pačynaŭsia novy padjom pry kancy 80-ch, kali savieckaja systema kanała, kab abrynucca pad udarami “aksamitnaj revalucyi”.
Karciny mienavita hetaha peryjadu možna budzie pahladzieć na nastupnym tydni ŭ mienskim kinateatry “Pieramoha”.
Najbolš cikavym padajecca film “Čas słuhaŭ” (14 kastryčnika, 18.30) Ireny Paŭłaskovaj — dački kinakrytyka Neli Paŭłaskovaj. Heta psychalahičnaja drama pra składanaści kachańnia i pomsty. Biezadkaznaje kachańnie pieratvaraje ścipłuju studentku-medyčku ŭ mehieru, jakaja krucić blizkimi j kalehami, jak cackami. Karcina z pośpiecham prajšła na kinafestyvalach u Kanach, Ženevie j Manreali, a vykanaŭca hałoŭnaj mužčynskaj roli Karał Roden, aktor u piatym kalenie, paśla hetaha filmu debiutavaŭ u Halivudzie. Paŭłaskova praź dziesiać hadoŭ źniała praciah — “Čas pazykaŭ”, jaki staŭsia samym naviedvalnym filmam u Čechii ŭ 98-m.
U prahramie českaha kino taksama “Praklon domu Hajnaŭ” (15 kastryčnika, 19.00) režysera Iržy Svabady — psychalahičny tryler u styli retra, jaki ŭžo adnoj nazvaj namiakaje na znakamituju navełu Edhara Po. Filmy “Pavucińnie” (16 kastryčnika, 19.00) i “Padzieja 88” (17 kastryčnika, 19.00) pryśviečanyja moładzievym prablemam, a stužka “Kali ŭ vieraśni išoŭ doždž” (18 kastryčnika, 19.00) — ekranizacyja ramanu Jana Otčanašaka.
A 19 kastryčnika viadzicie ŭ “Pieramohu” małych — buduć pakazvać českija multfilmy. Pačatak a 12-j.
Andrej Rasinski
