Ciapier nie 2001 hod
Pytańnie staić «abo — abo»
Trom akruham ułady nadajuć asabliva pilnuju ŭvahu. Heta Kołasaŭskaja akruha stalicy, dzie balatujecca lider PKB Siarhiej Kalakin, Sucharaŭskaja, dzie idzie Anatol Labiedźka, i Ŭschodniaja Vincuka Viačorki — troch znakavych fihuraŭ demakratyčnych partyjaŭ. Na pytańni «NN» adkazvaje staršynia Partyi BNF Vincuk Viačorka.
«NN»: Pieršuju častku pieradvybarnaje kampanii (vyłučeńnie j rehistracyja kandydataŭ u deputaty) možna ličyć zavieršanaj. Jak by Vy acanili hety etap?
Vincuk Viačorka: Z hledzišča zadačaŭ, što my pierad saboju stavili, — stanoŭča. Ja asabista abyšoŭ kala siamisot kvateraŭ, a kali padsumavać abychod kvateraŭ «frontaŭskimi» pretendentami j ludźmi ź ichnych inicyjatyŭnych hrupaŭ, my pryjšli da socień tysiačaŭ čałaviek. Sumarna demakratyčnyja siły dajšli badaj što da miljonaŭ. Heta było nadzvyčaj važna — upieršyniu za doŭhija hady prademanstravać ludziam uvasoblenuju alternatyvu isnaj uładzie. Alternatyvu, jakaja sama da ich prychodzić, adkazvaje na balučyja pytańni, prapanuje pazytyŭnaje vyjście.
«NN»: Ale ž prykryja admovy ŭ rehistracyi kandydataŭ …
VV: Rehistracyja — heta tolki adzin z etapaŭ filtracyi.
«NN»: Jakaja była lohika ŭładaŭ u tarmažeńni adnych demakratyčnych kandydataŭ i spryjańni inšym?..
VV: Pra «spryjańnie» nia viedaju. Na dobry ład, musili rehistravać, kali dakumenty ŭ paradku. Ale, naprykład, nie zarehistravali Jurasia Hubareviča ŭ Biełaaziersku, jaki sabraŭ kala 6 tysiačaŭ podpisaŭ. «Adsiejali» praf. Juryja Chadyku, papularnych u svaich miaścinach Siarhieja Antusieviča (Horadnia), Valera Pucickaha (Rečyca), Ivana Šehu (Słonim). Prymusili źniacca praz pahrozu zvolnić Źmitra Ševiela (Łahojsk), Alesia Hrycaŭca (Baranavičy). Pahražajuć Alesiu Miechu (Kobryń), zvolnili Volhu Łahvinovič (Maładečna). Tymčasam amal usiudy zarehistravali pretendentaŭ, jakija nie źbirali podpisaŭ, a byli vyłučanyja źjezdam Partyi BNF, kab «zakryć» peŭnyja akruhi, dzie nie było miascovych kandydataŭ. Heta mahło b śviedčyć pra analityčny padychod — kaho prapuskać, kaho nie. U Miensku znakavych postaciaŭ, u tym liku kiraŭnikoŭ partyjaŭ, rehistravali, kab stanoŭča zaznačycca pierad suśvietnaju demakratyčnaju hramadoju. Kaho jany taksama pieravažna rehistravali — heta kandydataŭ na prastornych sielskich akruhach: Ryhor Kostusieŭ — Škłoŭski, Białynicki, Kruhlanski rajony, ci Andrej Jurkoŭ — Horacki, Drybinski, Mścisłaŭski. U tych samych akruhach parehistravali kalehaŭ z AHP. Vidavočna, spadziajucca, što nia chopić mocy j mahčymaściaŭ abjechać vialikija abšary j zabiaśpiečyć na ich nazirańnie. Dobra, što dali kandydackija paśviedčańni Vasilu Hłavackich u Navapołacku, Siarhieju Sałašu ŭ Barysavie. Vidać, nastupnaja chvala adsievu napieradzie.
«NN»: Vy pravodzicie svaju publičnuju palityčnuju dziejnaść pa-biełarusku. Ci ŭpłyvaje moŭny režym na chadu ciapierašniaje vybarčaje kampanii?
VV: Absalutna nie ŭpłyvaje. Usio heta niedarečnyja strachi, jakimi nas sprabavali źbić z tropu niekatoryja «kansultanty»… U mianie byli tolki try epizody z socień, kali ludzi niešta spytalisia pra movu. Adzin raz spytalisia, ci «mohu ja hovoriť po-russki», ja skazaŭ, što mahu, ale praciahvaŭ pa-biełarusku, i podpis mnie pastavili achvotna. Vajskoviec spytaŭsia, ci nie źbirajemsia my hvałtam uvodzić biełaruskuju movu. Ja adkazaŭ, što BNF suprać lubych formaŭ hvałtu. I toj pastaviŭ svoj podpis. Mova nia jość prablemaju ani ŭ kamunikacyjach, ani ŭ pazytyŭnym ci nehatyŭnym vobrazie čałavieka, jaki prychodzić na paroh. Bolš za toje, mova dobra pazycyjanuje kandydataŭ ad BNF, dazvalaje ich adrazu raspaznać siarod inšych pretendentaŭ.
Poŭnaściu hety artykuł možna pračytać u papiarovaj i pdf-versii "Našaj Nivy"
Hutaryŭ Siarhiej Chareŭski
