Prablemy ŭ siamji Małaščankaŭ, pradprymalnikaŭ z Baranavičaŭ, pačalisia letaś.
Małaščanki arandujuć pamiaškańnie ŭ budynku miascovaje filii «Pryjorbanku». Handlujuć filtrami dla vady, dadatkova raspaŭsiudžvajuć biełaruskija knihi, hazety j časopisy. U minułym hodzie paŭstała pytańnie praciahu damovy arendy pamiaškańnia. Vyrašyli jaho tady na karyść pradprymalnikaŭ.
«Sioleta nam admovili, spasłaŭšysia na vytvorčuju nieabchodnaść» — raspaviała Taciana Małaščanka. Pavodle jaje słovaŭ, u vyzvalenym pamiaškańni vyrašyli raźmiaścić adździeł kredytavańnia.
Spn. Taciana miarkuje, što pryčyna nie ŭ vytvorčaj nieabchodnaści: «My šmat kamu mulajem vočy — i knihi z hazetami ŭ nas «niapravilnyja» pradajucca, i šylda reklamnaja nad uvachodam nia tych koleraŭ».
Jana ŭzhadvaje, što jašče letaś inžyner MTA bankaŭskaha adździaleńnia, u jakim jany arandujuć pamiaškańnie, Žana Karačun zacikaviłasia asarytmentam kramy i zhaniła jaho. A mienavita jana ŭkładaje damovu arendy pamiaškańnia.
Dyrektar baranavickaje filii 505 CBU «Pryjorbanku» Aleh Hładyščuk, razvodzić rukami: maŭlaŭ, jon ničoha nia moža zrabić, usio vyrašaje inžynerka, jana padparadkoŭvajecca niepasredna staličnamu načalstvu. A. Hładyščuk paćvierdziŭ niemahčymaść praciahu damovy, a potym raspavioŭ, što jon taksama patryjot svajoj radzimy, ale adździalaje pracu ad pohladaŭ. Na raźvitańnie jon paraiŭ pradprymalnicy zrabić toje samaje, tady i prablemy pierastanuć uźnikać.
Raspaŭsiud niezaležnaj presy ŭ Baranavičach znachodzicca pad pilnym kantrolem miascovych čynoŭnikaŭ. Małaščanki — vierniki hreka‑katalickaj carkvy, ale pakolki ich supołka nia maje svajoj carkvy ŭ Baranavičach, to naviedvajuć jany miascovuju ryma‑katalickuju carkvu Śviatoj Trojcy. Biaruć z saboj kolki asobnikaŭ «NN», kab razdać inšym viernikam. Heta nie spadabałasia miascovamu ideolahu, jaki vynies papiaredžańnie śviataru Jaŭhienu Malinoŭskamu, a samych raspaŭsiudnikaŭ aštrafavaŭ.
«U lubym razie my budziem rabić, što rabili», — kaža Taciana Małaščanka. Heta ž naša mova, jakaja biaz presy i knih nia vyžyvie.
