«My ŭnieśli ŭ Minsielhascharč i va ŭrad prapanovu ab admienie dziejańnia rekamiendavanych cen u dačynieńni da biržavych tarhoŭ.
My ličym, što vytvorca sam pavinien adsočvać rynak i pryznačać canu na svoj tavar», — zajaviŭ na pres-kanfierencyi 31 lipienia ŭ Minsku načalnik adździeła mietadałohii i pierśpiektyŭnaha raźvićcia AAT «Biełaruskaja ŭniviersalnaja tavarnaja birža» Siarhiej Majsiejčyk.
«Jość elemient, jaki pieraškadžaje biržavomu handlu małočnaj pradukcyjaj. Zastaŭsia z dabiržavych časoŭ taki rudymient, jak vyznačeńnie Minsielhascharčam rekamiendavanych cen, i zrazumieła, usio na heta aryjentujucca. Hetyja ceny adstajuć ad realnych rynačnych cen», — skazaŭ Majsiejčyk.
Pavodle jaho mierkavańnia, prablem z arhanizacyjaj biržavaha handlu sielhaspradukcyjaj niama.
«Jość prablema z žadańniem vytvorcaŭ handlavać u adkrytuju.
Raniej na biržy miljonami dołaraŭ vyličałasia vyručka našych vytvorcaŭ, tarhi pravodzilisia amal štodnia. Birža šmat zrabiła dla farmiravańnia puła pakupnikoŭ, najpierš u Rasii. Ale ciapier našych pierapracoŭščykaŭ małaka nie zusim zadavalniajuć našy prazrystyja schiemy, choć ekanamičny efiekt ad biržavych tarhoŭ vidavočny», — adznačyŭ Majsiejčyk.
Na suśvietnym rynku cana na suchoje abiastłuščanaje małako značna nižejšaja, čym u Rasii.
Pra heta raspavioŭ namieśnik načalnika infarmacyjna-analityčnaha ŭpraŭleńnia — načalnik adździeła markietynhu i analityki BUTB Vital Ancipaŭ. «U hetym płanie razbałavanyja blizkaściu Rasii eksparciory zakinuli dalokija rynki i skancentravalisia na pastaŭkach u RF. U 2008 hodzie Minsielhascharč pačaŭ rehulavać ceny.
Pry padzieńni cen na suśvietnym rynku Biełaruś čakała bolš vysokija ceny i stvaryła zapasy. Potym była pryniata prapanova ab realizacyi pa zanižanych cenach. Heta, mahčyma, i vyklikała tak zvanyja małočnyja vojny.
Zaraz u Rasii idzie zamiena biełaruskaj pradukcyi na novaziełandskuju, bielhijskuju, francuzskuju, litoŭskuju, łatvijskuju. I heta pradukcyja tańniejšaja za biełaruskuju», — adznačyŭ pradstaŭnik BUTB.
«My vyjšli z prapanovaj u Saŭmin, što nastaŭ čas spyniać anarchiju na rynku i pryvieści ŭsio da cyvilizavanaha rynku, pry jakim pradukcyja, jakaja datujecca dziaržavaj, pavinna pradavacca poŭnaściu prazrysta», — skazaŭ Ancipaŭ.
